23 قىركۇيەك, 20:59 394 0 دەنساۋلىق انار لەپەسوۆا

COVID-19: ق.توقاەۆ الەم ەلدەرىن ۆاكتسينا دايىنداۋدى ساياسيلاندىرماۋعا شاقىردى

كوروناۆيرۋسقا قارسى ۆاكتسينا ازىرلەۋ ماسەلەسىن ساياسيلاندىرۋعا جول بەرمەۋ كەرەك. بۇل تۋرالى بۇۇ باس اسسامبلەياسى 75-سەسسياسىنىڭ جالپىساياسي دەباتتارىندا  سويلەگەن سوزىندە قر پرەزيدەنتى قاسىم-جومارت توقاەۆ ايتتى. 

«كوروناۆيرۋس ىندەتى جاپپاي تارالا باستاعاننان كەيىن بۇۇ-نىڭ ءتۇرلى قورلارى مەن باعدارلامالارى داعدارىسقا قارسى تۇرۋ ءۇشىن دەرەۋ جۇمىلدىرىلدى. الايدا، حالىقارالىق قوعامداستىق اتالعان باعىتتا بۇدان دا كوپ شارا قابىلداۋى كەرەك»،- دەدى مەملەكەت باسشىسى.

قاسىم-جومارت توقاەۆتىڭ پىكىرىنشە، دەنساۋلىق ساقتاۋ ءىسىنىڭ قۋاتتى جاھاندىق جۇيەسىن قۇرۋ ماقساتىندا دامىعان ەلدەر مەن بۇۇ اگەنتتىكتەرىنىڭ ۋاقىتىلى جانە ۇيلەسىمدى قولداۋى ارقىلى دامۋشى ەلدەردىڭ مەديتسينالىق مەكەمەلەرىندەگى ۇلتتىق ينستيتۋتتاردى جاڭعىرتۋعا باسىمدىق بەرۋ قاجەت.

سونداي-اق، پرەزيدەنت ىندەتكە قارسى ەكپەنى دايىنداۋ مەن ونى تاسىمالداۋ تيىمدىلىگىن ارتتىرۋعا قاتىستى ۇسىنىستارىن ورتاعا سالدى.

«COVID-19 ىندەتىنە قارسى ۆاكتسينا ازىرلەۋ ماسەلەسىن ساياسيلاندىرۋعا جول بەرمەۋ كەرەك. اتالعان ماڭىزدى ماسەلەدە ينۆەستيتسيا جانە ساۋدا جونىندەگى جان-جاقتى حالىقارالىق كەلىسىمگە قول جەتكىزۋ قاجەت. بۇل جاھاندىق دەڭگەيدەگى ۆاكتسينا وندىرىسىنە جانە ونى جەتكىزۋ بارىسىندا لوگيستيكالىق تاسىمالدىڭ تيىمدىلىگىنە سەپتىگىن تيگىزەدى»، - دەدى قاسىم-جومارت توقاەۆ.

ايتا كەتەيىك، بۇعان دەيىن بۇۇ باس حاتشىسى الەم ەلدەرىن ۆاكتسينا جايلى جالعان اقپاراتتارمەن كۇرەسۋگە شاقىرعان ەدى.

ا.گۋتەرريشتىڭ سوزىنشە، ۆاكتسيناعا بۇكىلالەمدىك يگىلىك دەپ قاراۋ كەرەك. ويتكەنى COVID-19 ەپيدەمياسىندا شەكارا جوق. سوندىقتان الەم ەلدەرىنىڭ بارلىعىنا قولجەتىمدى ۆاكتسينا جاسالۋى ءتيىس دەيدى باس حاتشى.

ەسكە سالا كەتسەك، جۋىردا كوروناۆيرۋسقا قارسى قازاقستاندىق ۆاكتسينانى كلينيكالىق زەرتتەۋ باستالدى.

قر بعم عىلىم كوميتەتىنىڭ بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىندا ازىرلەنگەن QazCovid-in ۆاكتسيناسىنىڭ كلينيكالىق سىناعى18-50 جاس ارالىعىنداعى دەنى ساۋ ەرەسەك ەرىكتىلەر اراسىندا جۇرگىزىلەدى. ۆاكتسينانىڭ قاۋىپسىزدىگىن انىقتاۋعا باعىتتالعان زەرتتەۋدىڭ I فازاسىنا كوروناۆيرۋسپەن اۋىرماعان جانە انتيدەنەلەرى جوق 44 ەرىكتى قاتىسادى. يممۋنوگەندىلىكتى زەرتتەۋگە باعىتتالعان ەكىنشى فازادا 200 ەرىكتى قاتىسپاق.

 

سوڭعى جاڭالىقتار