23 قىركۇيەك, 17:35 364 0 ءبىلىم ءدىلدا ۋاليبەك

اباي ۋنيۆەرسيتەتى جەمقورلىققا قارسى حالىقارالىق سەرتيفيكات الدى

17 قىركۇيەكتە اباي ۋنيۆەرسيتەتىنىڭ رەكتورى تاكير بالىقباەۆتىڭ ەسەپ بەرۋ كەزدەسۋى ءوتتى. كەزدەسۋ Zoom پلاتفورماسىندا ونلاين فورماتتا ءوتتى، سونداي-اق ۋنيۆەرسيتەتتىڭ رەسمي پاراقشالارىندا كورسەتىلدى.

ءىس-شاراعا قالالىق ءماسليحات دەپۋتاتتارى، الماتى قوعامىنىڭ وكىلدەرى، جوعارى وقۋ ورىندارىنىڭ رەكتورلارى، عىلىمي ينستيتۋتتار مەن وقۋ ورىندارىنىڭ ديرەكتورلارى، «نۇر وتان» پارتياسىنىڭ مۇشەلەرى، بۇقارالىق اقپارات قۇرالدارىنىڭ وكىلدەرى، شەتەلدىك ەلشىلىكتەردىڭ كونسۋلدىق مەكەمەلەرىنىڭ قىزمەتكەرلەرى، اتا-انالار، پروفەسسور-وقىتۋشىلار قۇرامى مەن ستۋدەنتتەر قاتىستى.

تاكير بالىقباەۆ ءوز بايانداماسىندا 2019/2020 وقۋ جىلىن قورىتىندىلادى، ۋنيۆەرسيتەتتىڭ ءبىلىم بەرۋ، عىلىمي-يننوۆاتسيالىق، قارجى-شارۋاشىلىق جانە الەۋمەتتىك-تاربيەلىك قىزمەتى تۋرالى ەگجەي-تەگجەيلى ەسەپ بەردى، الەمدىك جانە ۇلتتىق رەيتينگتەردەگى جەتىستىكتەردى اتاپ ءوتتى، ۋنيۆەرسيتەتتىڭ دامۋىنىڭ ستراتەگيالىق مىندەتتەرى مەن باعىتتارىن ايقىندادى.

ۋنيۆەرسيتەت باسشىسى اتاپ وتكەندەي، «قازۇپۋ قىزمەتى ورتا ءبىلىم بەرۋدىڭ جاڭارتىلعان مازمۇنى مەن مۇعالىمنىڭ كاسىبي قۇزىرەتتىلىگىنە قويىلاتىن جاڭا تالاپتار جاعدايىندا پەداگوگتاردى دايارلاۋدى جەتىلدىرۋگە باعىتتالعان». پەداگوگتاردىڭ جۇمىسىن جانداندىرۋ جانە ىنتالاندىرۋ ءۇشىن جاڭا وقۋ جىلىندا جالاقى 25% كوتەرىلدى. بۇل قولداۋ ءبىلىم ساپاسىنا اسەر ەتەدى.

اباي اتىنداعى قازۇپۋ جىل سايىن الەمدىك جانە رەسپۋبليكالىق رەيتينگتەردە ءوز پوزيتسياسىن جاقسارتىپ كەلەدى. QS World University Rankings الەمدىك رەيتينگىندە اباي اتىنداعى قازۇپۋ 601-650-ءشى ورىنداردى يەلەنىپ، الەمنىڭ ۇزدىك 5 پەداگوگيكالىق جوعارى وقۋ ورىندارىنىڭ قاتارىنا كىردى. قر جوو اراسىنداعى رەيتينگتە اباي ۋنيۆەرسيتەتى التىنشى ورىنعا يە بولدى. QS World University Ranking, EECA - 105 ورىندا (2019 - 103).

Webometrics الەمدىك رەيتينگىنە ەلىمىزدىڭ 128 جوو كىردى. بۇل رەيتينگتە Abai University سايتى 4995-ءشى ورىندى يەلەندى. 2020 جىلعى قاڭتاردىڭ (6022) كورسەتكىشىمەن سالىستىرعاندا ۋنيۆەرسيتەت 1027 پوزيتسياعا كوتەرىلدى. اككرەديتتەۋ جانە رەيتينگتىڭ تاۋەلسىز اگەنتتىگىنىڭ 2020 جىلعى رەيتينگىسىندە اباي اتىنداعى قازۇپۋ ەلدىڭ ءتورت ۇزدىك ۋنيۆەرسيتەتىنىڭ قاتارىنا ەندى. پەداگوگيكالىق جوو اراسىندا ۋنيۆەرسيتەتىمىز ءبىرىنشى ورىنعا يە بولدى. باكالاۆرياتتىڭ ءبىلىم بەرۋ باعدارلامالارى باعىتىنداعى ۋنيۆەرسيتەتتەردىڭ قورىتىندى كورسەتكىشتەرى بويىنشا ينستيتۋتسيونالدىق رەيتينگىندە (24345) قر  جوعارى وقۋ ورىندارىنىڭ اراسىندا ءبىرىنشى ورىنعا يە بولدى.

ەڭبەك نارىعىنداعى تۇلەكتەرگە دەگەن سۇرانىس جانە جۇمىس بەرۋشىلەردىڭ جاس مامانداردى كاسىبي دايارلاۋ ساپاسىنا قاناعاتتانۋى دا جوعارى دەڭگەيدە. اباي اتىنداعى قازۇپۋ تۇلەكتەرىنىڭ جۇمىس بەرۋشىلەرى الماتى، نۇر-سۇلتان قالالارىنىڭ جانە الماتى وبلىسىنىڭ، سونداي-اق رەسپۋبليكانىڭ بارلىق وڭىرلەرىنىڭ ءبىلىم بەرۋ مەكەمەلەرى بولىپ تابىلادى. جۇمىس بەرۋشىلەرمەن ءوزارا بايلانىستى نىعايتۋ ماقساتىندا 2019 جىلى قازۇپۋ-دىڭ «Mansap» ءموبيلدى قوسىمشاسى ازىرلەندى. بۇل قوسىمشا جۇمىس ىزدەۋدى جانە ۋنيۆەرسيتەت تۇلەكتەرىن جۇمىسقا ورنالاستىرۋدى ەداۋىر جەڭىلدەتەدى: 4063 پايدالانۋشى (1012 جۇمىس بەرۋشى، 3051 ستۋدەنت).

زاماناۋي ۋنيۆەرسيتەت قىزمەتىنىڭ ماڭىزدى اسپەكتىسى جوعارى بىلىكتى پروفەسسور-وقىتۋشىلار قۇرامىن قالىپتاستىرۋ بولىپ تابىلادى. شەتەلدىك سەرىكتەس جوعارى وقۋ ورىندارىنىڭ پروفەسسورلارى تارتىلدى، رەسپۋبليكانىڭ بارلىق دەرلىك وقىتۋشىلارى قىسقى جانە جازعى مەكتەپتەردە، «تسيفرلىق پەداگوگ» ونلاين-مەكتەبىندە جانە وسى باعىتتاعى ۋنيۆەرسيتەتتىڭ باسقا جوبالارى مەن باعدارلامالارىنا قاتىسىپ، بىلىكتىلىگىن ارتتىردى.

اباي ۋنيۆەرسيتەتى قازاقستاننىڭ جوعارى وقۋ ورىندارىنىڭ اراسىندا ءبىرىنشى بولىپ ISO 37001-2016 حالىقارالىق ستاندارتىنىڭ سىبايلاس جەمقورلىققا قارسى باسقارۋ جۇيەسىن ەنگىزۋ تۋرالى سەرتيفيكات الدى.

اشىقتىق پەن قولجەتىمدىلىكتى قامتاماسىز ەتۋ ماقساتىندا ۋنيۆەرسيتەت رەكتورى تۇراقتى تۇردە تىكەلەي ەفيرلەر مەن Openspace فورماتىندا  كەزدەسۋلەر وتكىزەدى، ءوزىنىڭ بلوگى مەن پوشتاسىنا كەلىپ تۇسكەن وتىنىشتەردى جەكە قارايدى، الەۋمەتتىك جەلىلەردە جەكە اككاۋنتتارىن جۇرگىزەدى. بارلىق وتىنىشتەر بويىنشا ءتيىستى شارالار قابىلدانىپ، ولاردىڭ ورىندالۋى باقىلانادى. تاكير بالىقباەۆ ۋنيۆەرسيتەت باسشىلىعى قوعاممەن بايلانىس ورناتۋ باعىتىندا بارلىق  كوممۋنيكاتسيا تۇرلەرىن كۇشەيتەتىندىگىن باسا ايتتى.

سوڭعى جاڭالىقتار