23 قىركۇيەك, 16:39 392 0 ءبىلىم Túrkistan Gazeti

ونەر اكادەمياسىنىڭ ستۋدەنتتەرىنە ارنالعان 300 ورىندىق جاتاقحانا قۇرىلىسى جوسپارعا ەندى

ت.جۇرگەنوۆ اتىنداعى قازۇوا رەكتورى اقان ابدۋاليەۆتىڭ حالىق الدىندا ونلاين ەسەپ بەرۋ جيىنى ءوتتى. شاراعا مادەنيەت جانە سپورت مينيسترلىگى وكىلدەرى، ەلىمىزدىڭ جەتەكشى جوو رەكتورلارى، تەاتر جانە ونەر مەكتەپتەرى باسشىلارى، باق وكىلدەرى، اكادەميا ۇجىمى، اتا-انالار مەن ستۋدەنتتەر قاتىستى.

بولاشاق مادەنيەت سالاسى وكىلدەرىن دايىندايتىن ءبىلىم ورداسىنىڭ رەكتورى ا.ابدۋاليەۆ كوپشىلىك الدىندا وتكەن وقۋ جىلىندا اتقارىلعان جۇمىستار جايىمەن ءبولىستى. اتالعان  شارا بارىسىندا اكادەميانىڭ العا قويىپ وتىرعان جوسپارلارى دا كەڭ اۋقىمدا تالقىلاندى.

اقان جىلقىشىبايۇلى پرەزيدەنت قاسىم-جومارت توقاەۆتىڭ «الداعى 5 جىلدا كەمىندە 90 مىڭ جاتاقحانا ورنى سالىنۋى كەرەك. جاتاقحانا وتە وزەكتى ءارى ومىرلىك ءمانى بار ماسەلە»، – دەگەن تاپسىرماسىنا وراي، ت.جۇرگەنوۆ اتىنداعى قازۇوا 300 ورىندىق جاتاقحانا سالۋدى باستايتىنىن جەتكىزدى. سونداي-اق، رەكتور ءوز بايانداماسىندا بىرقاتار وزگەرىستەرگە دە توقتالدى. ول وتكەن وقۋ جىلىنىڭ باسىندا وقۋ ءىسىن ۇيىمداستىرۋ جانە باقىلاۋدى جاقسارتۋ ءۇشىن وقۋ پروتسەسىن مونيتورينگ جاساۋ ءبولىمى قۇرىلعانىن اتاپ ءوتتى. اكادەميانىڭ اكىمشىلىك جۇمىسىن ۇيىمداستىرۋدى جانە باسقارۋدى جاقسارتۋ ءۇشىن رەكتور ءوفيسى، 1 شىلدەدەن اكادەميادا سىبايلاس جەمقورلىققا قارسى مادەنيەتتى قالىپتاستىرۋ ءبولىمى، 15 مامىردان باستاپ قاشىقتان وقىتۋ ءبولىمى ەنگىزىلگەنىن جەتكىزدى.

رەكتوردىڭ بەرگەن ەسەبىنەن 2019-2020 وقۋ جىلدارى اكادەميا ءۇشىن جەڭىستى دە جەمىستى جىل بولعانىن اڭعارۋ قيىن ەمەس. اكادەميا باسشىسى ستۋدەنتتەردىڭ جەتىستىكتەرىنە دە توقتالدى. اتاپ ايتساق، اكادەميا ستۋدەنتى بەكسۇلتان كەنىشقاليەۆ «سلاۆيان بازارى» بايقاۋىندا جۇلدەلى 3 ورىندى يەلەنسە، ال اعايىندى زاۋرە جانە اسان ناربوتاەۆتار رەسەيدەگى «رەنەسسانس گيتارى-2020» فەستيۆال-بايقاۋىندا ءۇشىنشى ورىندى قانجىعالارىنا بايلاعان. حورەگرافيا فاكۋلتەتىنىڭ ستۋدەنتى بوتاكوز كامباەۆا بەلگورودتا (رەسەي) وتكەن «سوزۆەزديە تۆورچەستۆا» اتتى حالىقارالىق حورەوگرافتار بايقاۋىندا «حالىقتىق-ساحنالىق بي» نوميناتسياسىندا 1-ورىن يەلەنگەن.
«قاشىقتان وقىتۋ جاعدايىندا ستۋدەنتتەردىڭ ءبىلىم ساپاسىن ارتتىرۋ ءۇشىن ەلەكتروندى كىتاپحانا ىسكە قوسىلدى. «قازىرگى كەزەڭدە 5 مىڭعا جۋىق كىتاپتىڭ ەلەكتروندى نۇسقاسى جاسالىپ، ەلەكتروندى كىتاپحاناعا جۇكتەلۋدە»، – دەدى ا.ابدۋاليەۆ.
مەملەكەت باسشىسى قاسىم-جومارت توقاەۆ ورتالىق اتقارۋشى ورگاندار باسشىلارىنىڭ، اكىمدەردىڭ جانە ۇلتتىق جوعارى وقۋ ورىندارى رەكتورلارىنىڭ حالىققا ەسەپ بەرۋ كەزدەسۋلەرىن وتكىزۋ تۋرالى جارلىققا وزگەرىس ەنگىزگەن بولاتىن. وسى وزگەرىستەرگە ساي بەينەكونفەرەنتسيا بايلانىسىن، الەۋمەتتىك جەلىلەردەگى رەسمي اككاۋنتتاردا جانە بۇقارالىق اقپارات قۇرالدارى سالاسىنداعى ۋاكىلەتتى ورگان ايقىندايتىن اقپاراتتىق ينتەرنەت-رەسۋرستا ونلاين-ترانسلياتسيالار ۇيىمداستىرا وتىرىپ، جۇرتشىلىق وكىلدەرىمەن ەسەپ بەرۋ كەزدەسۋلەرىن وتكىزۋ تۋرالى تاپسىرما بەرىلگەن ەدى.

اتالمىش جيىن بارىسىندا وعان قاتىسۋ مۇمكىندىگىمەن قاتار، رەكتورعا ساۋال جولداۋعا دا جاعداي تۋعىزىلعان. الەۋمەتتىك جەلىلەر ارقىلى ەسەپ بەرۋ جيىنىنىڭ ۋاقىتى مەن وتەتىن پلاتفورمالارى، سۇراقتار قويۋعا ارنالعان بايلانىس نومىرلەرى الدىن الا حابارلانعان.

سوڭعى جاڭالىقتار