23 قىركۇيەك, 15:11 425 0 كولىك انار لەپەسوۆا

نۇر-سۇلتان – ماسكەۋ باعىتىندا اۋە رەيستەرى جاندانادى

«Air Astana» اۋە كومپانياسى رەسەيمەن اراداعى تۇراقتى رەيستەردى قالپىنا كەلتىرەدى.

اۋە كومپانياسىنىڭ نۇر-سۇلتاننان ماسكەۋگە (دومودەدوۆو) تىكەلەي رەيستەرى 2020 جىلدىڭ 26 قىركۇيەگىنەن باستاپ اپتاسىنا ءبىر رەت - سارسەنبى كۇندەرى (Boeing 767 لاينەرى) جاسالادى. نۇر-سۇلتاننان ۇشاق ساعات 21.40-تا ۇشىپ شىعىپ، ماسكەۋگە 22.15-تە جەتەدى. ماسكەۋدەن ۇشاق 23.15-تە ۇشىپ، نۇر-سۇلتانعا ساعات 05: 35-تە ۇشىپ كەلەدى.

«ازىرگە بۇل رەيسكە تەك قازاقستان مەن رەسەي فەدەراتسياسىنىڭ ازاماتتارى جانە قر-دا تۇرۋعا ىقتيارحاتى بار ادامدار قابىلدانادى. ماسكەۋگە باراتىن قازاقستاندىقتار ساۋالنامادان ءوتىپ، قولىندا رەيستەن ءارى كەتكەندە 3 كۇن بۇرىن جاسالعان كوروناۆيرۋس جۇقتىرماعانى تۋرالى پتر-تەستىنىڭ انىقتاماسى بولۋى كەرەك. ەڭبەك ەتۋ ماقساتىمەن باراتىن ازاماتتار ەكى اپتا ىشىندە ۇيدەگى كارانتيندە وتىرۋى ءتيىس»، - دەپ حابارلايدى «Air Astana» اۋە كومپانياسىنان.

ماسكەۋگە باراتىن رەسەي ازاماتتارى بيلەت ساتىپ العانىمەن، رەيسكە تىركەلۋگە دەيىن «مەملەكەتتىك قىزمەتتەر» پورتالىندا ساۋالناما تولتىرۋى كەرەك. وعان قوسا 72 ساعات ىشىندە رەسەي ازاماتتارى كوروناۆيرۋس بار-جوعىن انىقتايتىن پتر-تەستىدەن ءوتىپ، ناتيجەسىن «مەملەكەتتىك قىزمەتتەر» پورتالىنا سالىپ قويۋى كەرەك.

رەسەيلىك جولاۋشىلار قازاقستانعا كەلگەننەن كەيىن 48 ساعات ىشىندە كوروناۆيرۋس تەكسەرەتىن تەستىدەن نەمەسە 14 كۇندىك ۇيدەگى كارانتيننەن ءوتۋى ءتيىس. ەگەر قازاقستانعا كىرگەندە وسىنداي انىقتامانى العانىنا 5 كۇن وتپەگەن جاعدايدا، ونى قازاقستاندا قايتا الدىرۋدىڭ قاجەتى جوق. ءۇشىنشى ەلدەرگە ماسكەۋ ارقىلى ترانزيتكە ۋاقىتشا تىيىم سالىنعان.

 

سوڭعى جاڭالىقتار