23 قىركۇيەك, 12:09 462 0 زاڭ انار لەپەسوۆا

ەلىمىزدە مەملەكەتتىك قىزمەتكەرگە سىيلىق بەرۋگە تىيىم سالاتىن زاڭ قابىلداندى

قازاقستان پارلامەنتى مەملەكەتتىك قىزمەتكەرگە قۇنى قانداي دا بولسىن سىيلىقتار سىيلاۋعا تىيىم سالاتىن زاڭدى قابىلدادى. 

ءماجىلىس "قازاقستاننىڭ كەيبىر زاڭنامالىق اكتىلەرىنە سىبايلاس جەمقورلىققا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىن بيىل 3 ماۋسىمدا ماقۇلداعان ەدى.

17 قىركۇيەكتە سەنات قۇجاتقا بىرقاتار وزگەرىس ەنگىزىپ، تومەنگى پالاتاعا كەرى قايتاردى. ءماجىلىستىڭ بۇگىنگى جالپى وتىرىسىندا دەپۋتاتتار سەنات ەنگىزگەن وزگەرىستەردى ماقۇلدادى، دەپ حابارلايدى Sputnik قازاقستان.

"سەنات ەنگىزگەن وزگەرىستەر ءماجىلىس ماقۇلداعان زاڭ جوباسىنىڭ تۇجىرىمداماسىن وزگەرتپەيدى جانە مازمۇنىن ناشارلاتپايدى", – دەدى ماجىلىسمەن جانات جاراسوۆ.

سەناتورلار قىلمىستىق كودەكستىڭ 412-1-بابىنا (قىلمىس جاساۋعا ارانداتۋ) وزگەرىستەر ەنگىزدى. وعان سايكەس كەيىن اشكەرەلەۋ جانە قىلمىستىق جاۋاپتىلىققا تارتۋ نەمەسە بوپسالاۋ ماقساتىندا ادامدى قىلمىس جاساۋعا كوندىرگەن جەدەل-ىزدەستىرۋ قىزمەتىن نەمەسە سوتقا دەيىنگى تەرگەپ-تەكسەرۋدى جۇزەگە اسىراتىن لاۋازىمدى ادامنىڭ زاڭسىز ارەكەتتەرى قىلمىس جاساۋعا ارانداتۋ بولىپ سانالادى.

بۇدان باسقا، اكىمشىلىك قۇقىق بۇزۋشىلىق تۋرالى كودەكستىڭ 1-بابى 2-1-بولىگىنە سايكەس، كودەكسكە وزگەرىستەر جانە (نەمەسە) تولىقتىرۋلار ەنگىزۋ قازاقستان رەسپۋبليكاسىنىڭ باسقا دا زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋدى كوزدەمەيتىن زاڭمەن جۇزەگە اسىرىلادى. وسىعان بايلانىستى اتالعان زاڭ جوباسىنان كودەكسكە وسى تۇزەتۋلەردى الىپ تاستاۋ ۇسىنىلدى.

 

سوڭعى جاڭالىقتار