22 قىركۇيەك, 09:07 603 0 جاڭالىقتار اسىل تۇمار

مەملەكەت باسشىسى بۇۇ 75 جىلدىعىنا ارنالعان شارادا ءسوز سويلەدى

قر پرەزيدەنتى قاسىم-جومارت توقاەۆ بۇۇ باس اسسامبلەياسىنىڭ 75 جىلدىعىنا ارنالعان جوعارى دەڭگەيدەگى ءىس-شارادا بەينەۇندەۋ جاسادى. بۇل شارا كوروناۆيرۋس ىندەتىنە بايلانىستى ونلاين فورماتتا ءوتتى. اقوردا مەملەكەت باسشىسىنىڭ سويلەگەن ءسوزىنىڭ تولىق ءماتىنىن ۇسىنادى.

* * *

قۇرمەتتى توراعا، قۇرمەتتى باس حاتشى، قىمباتتى ارىپتەستەر، حانىمدار مەن مىرزالار!

ادامزات جىلناماسىنداعى ەڭ جويقىن دۇنيەجۇزىلىك سوعىستان كەيىن 1945 جىلدىڭ ماۋسىم ايىندا مۇلدەم جاڭا ۇيىمنىڭ قۇرىلۋى – بارشامىز ءۇشىن ايتۋلى ءارى تاريحي وقيعا.

داگ حاممارشەلدتىڭ بىرىككەن ۇلتتار ۇيىمى «ءبىزدى جۇماققا جەتكىزۋ ءۇشىن ەمەس، توزاقتان قۇتقارۋ ءۇشىن قۇرىلعان» دەگەن قاناتتى ءسوزى بارشاعا ايان. باستاپقىدا بۇۇ ۇجىمدىق قاۋىپسىزدىكتى قامتاماسىز ەتۋ جۇيەسى رەتىندە قۇرىلعانىمەن، ءىس جۇزىندە الەم ەلدەرىن ورتاق ماقسات پەن مۇددەگە بىرىكتىردى. سونىڭ ارقاسىندا بەلسەندى ءارى اۋقىمدى حالىقارالىق ىنتىماقتاستىق ءداۋىرى ورنىقتى. ارينە، بۇل جول جەڭىل بولعان جوق. وكىنىشكە قاراي، وتكەن 75 جىل ىشىندە الەمدى قايعى-قاسىرەتتەن ارىلتۋعا باعىتتالعان ورتاق ماقساتتارىمىز بەن قۇندىلىقتارىمىزدى ىلگەرىلەتۋ جولىندا كوپتەگەن مۇمكىندىكتى قولدان جىبەرىپ الدىق. دەگەنمەن، ساتسىزدىكتەن دە، جەتىستىكتەن دە ساباق العان ءجون.

بۇۇ-نىڭ تەرەڭ تاريحى بەلسەندى ۇجىمدىق كۇش-جىگەردىڭ ارقاسىندا كەڭ اۋقىمدى ماسەلەلەردى تالقىعا سالۋ كەزەڭى بولدى. اتاپ ايتقاندا، وتارسىزدانۋدان ءوسىپ-وركەندەۋگە، بالالاردى قورعاۋدان كليماتتىڭ وزگەرۋىنە، دەنساۋلىق ساقتاۋ ىسىنەن ادام قۇقىعىنا، بەيبىتشىلىكتى قولداۋدان بىتىمگەرشىلىككە دەيىنگى تاقىرىپتار قامتىلدى.

سوڭعى وتىز جىلدا قازاقستان بۇۇ-نىڭ بارلىق باستى ورگاندارىندا، سونىڭ ىشىندە، قاۋىپسىزدىك كەڭەسىندە جانجالداردى رەتتەۋ، يادرولىق قارۋدى تاراتپاۋ جانە قارۋسىزدانۋ، تەرروريزمگە قارسى كۇرەس، كونفەسسياارالىق جانە ۇلتارالىق ديالوگ، تەڭىزگە شىعا المايتىن دامۋشى ەلدەردىڭ مۇددەسىن قورعاۋ سياقتى باسىمدىقتاردى دارىپتەۋگە اتسالىستى.

ال، ەندى بۇگىنگى زاماننىڭ سيپاتىنا زەر سالساق، كوپتەگەن جاڭا سىن-قاتەرلەر، سونداي-اق قايتا ەتەك العان كەيبىر تاۋەكەلدەر ءبىزدى وتكەن كەزەڭگە ورالتۋى مۇمكىن ەكەنىن بايقايمىز. قازىرگى تاڭدا مۋلتيلاتەراليزم زور قاتەرگە تاپ بولدى. مۇنداي احۋال قىرعي-قاباق سوعىس اياقتالعاننان بەرى تۋىنداماعان ەدى.

COVID-19 ىندەتىن اۋىزدىقتاۋ اسا قيىن بولىپ وتىر. الەمدە جاپپاي قارۋلانۋ ۇدەرىسى قايتادان بەلەڭ الىپ كەلەدى. ستراتەگيالىق دامۋ ماقساتتارىن جۇزەگە اسىرۋ ءىسى تۇرالاپ قالدى.

بۇۇ جارعىسىندا بەكىتىلگەن مۇرات-ماقساتتار بۇدان بىلاي كادەگە اسپايدى دەگەن پىكىر تاراۋدا. مەن ءوز ەلىمنىڭ پرەزيدەنتى جانە بۇۇ-نىڭ بۇرىنعى جوعارى لاۋازىمدى تۇلعاسى رەتىندە بۇل كوزقاراسپەن مۇلدە كەلىسپەيمىن.

بۇعان قاراماستان، ءبىز ءۇمىت وتىن وشىرمەي، قايتا ونى لاۋلاتۋىمىز كەرەك; ورتاق مۇرات-ماقساتتان باس تارتپاي، وعان قول جەتكىزۋ ءۇشىن كۇش-جىگەرىمىزگە تىڭ سەرپىن بەرۋىمىز قاجەت; انارحياعا جول بەرمەي، حالىقارالىق قۇقىققا نەگىزدەلگەن قوعامداستىق قۇرۋدى جالعاستىرۋعا ءتيىسپىز. بۇل – وتە كۇردەلى مىندەتتەر.

الداعى ونجىلدىق 2030 جىلعا دەيىنگى ورنىقتى دامۋدىڭ كۇن تارتىبىندە تۇرعان مىندەتتەرىن جۇزەگە اسىرۋ جانە قازىرگى زامانعى داعدارىستاردى ەڭسەرۋدىڭ ءتيىمدى جولىن تابۋ ءۇشىن شەشۋشى كەزەڭ بولادى. بۇل اۋقىمدى ماقسات ورتاق كۇش-جىگەردى جانە جاۋاپكەرشىلىكتى تالاپ ەتەدى.

ءبىز باس حاتشى انتونيۋ گۋتەرريشتىڭ تاباندى كوشباسشىلىق قىزمەتىنە ريزاشىلىق بىلدىرەمىز. سونداي-اق، ونىڭ بىرىككەن ۇلتتار ۇيىمىنداعى تيىمدىلىكتى، اشىقتىق پەن ايقىندىقتى ارتتىرۋ جونىندەگى قازىرگى جۇمىسىنا قولداۋ كورسەتەمىز. قازاقستان بۇۇ-نىڭ ميسسياسى مەن جارعىسىن بەرىك ۇستانادى.

سونىمەن قاتار، ەلىمىز تۇراقتى، ادىلەتتى جانە وركەندەگەن الەم قۇرۋ جولىنداعى ورتاق مىندەتتى جۇزەگە اسىرۋعا اتسالىسادى.

بىرىككەن ۇلتتار ۇيىمى اۋقىمدى ءارى بىردەن-ءبىر امبەباپ حالىقارالىق ۇيىم رەتىندە شىن مانىندە بالاماسىز بولىپ قالا بەرەتىنىنە سەنىمدىمىن.

نازارلارىڭىزعا راقمەت!

 

سوڭعى جاڭالىقتار