21 قىركۇيەك, 18:06 382 0 قاۋىپسىزدىك انار لەپەسوۆا

وسكەمەندە ترامۆاي مەن ءورت ءسوندىرۋ كولىگى سوقتىعىستى

وسكەمەن قالاسىندا ءورت ءسوندىرۋ ماشيناسى ترامۆايمەن سوقتىعىستى. بۇل تۋرالى شقو پوليتسيا دەپارتامەنتىنىڭ ءباسپاسوز قىزمەتى حابارلادى.

الدىن الا مالىمەتتەر بويىنشا، جول-كولىك وقيعاسى 21 قىركۇيەكتە تاڭعى ساعات 8:30 شاماسىندا ءۇلبى وزەنى ارقىلى وتەتىن كوپىردە بولعان. وقيعا كوپىردەن نۇرماعامبەتوۆ كوشەسىنە شىعاتىن جەردە ورىن الدى.

"ترامۆاي كوپىردەن كەلە جاتقان، ءورت ءسوندىرۋ ماشيناسى پروتوزانوۆ كوشەسىمەن قوزعالعان. ءورت ءسوندىرۋ ماشيناسىنىڭ قىزمەت بابىمەن ءورت سوندىرۋگە كەتىپ بارا جاتقاندىعى انىقتالدى. «سەرگەك» بەينەباقىلاۋ كامەرالارىنداعى جازبا زەرتتەلدى. بەينەجازبادا ءورت ماشيناسى جىپىلىقتاعان ماياكتارمەن قوزعالعانى انىق كورىنىپ تۇر. ترامۆاي ءورت ءسوندىرۋ كولىگىنە جول بەرمەدى", - دەپ ءتۇسىندىردى وبلىستىڭ پوليتسيا دەپارتامەنتى ءباسپاسوز قىزمەتى.

زارداپ شەككەندەر جوق. ترامۆاي جۇرگىزۋشىسىنە قاتىستى "ادام دەنساۋلىعىنا زيان كەلتىرۋگە، كولىك قۇرالدارىنا نەمەسە باسقا مۇلىككە زيان كەلتىرەتىن كولىك قۇرالدارى جۇرگىزۋشىلەرىنىڭ جول قوزعالىسى ەرەجەلەرىن بۇزۋى" بابى بويىنشا اكىمشىلىك حاتتاما جاسالدى.

سوڭعى جاڭالىقتار