21 قىركۇيەك, 16:48 572 0 ەكولوگيا انار لەپەسوۆا

قازاقستاندا قۇس تۇماۋىنىڭ ءورشۋ سەبەبى انىقتالدى

ەلىمىزدە قۇس تۇماۋىنىڭ كۇرت ورشۋىنە نە سەبەپ بولعانى بەلگىلى بولدى. قر اۋىل شارۋاشىلىعى ۆيتسە-ءمينيسترى گۇلميرا يساەۆا ءمان-جايدى ءتۇسىندىردى. 

«ەپيزووتيالىق زەرتتەۋ جۇمىستارى كورسەتكەندەي، الدىمەن، سولتۇستىكتەن وڭتۇستىككە كوشىپ بارا جاتقان جابايى قۇستاردىڭ ءولىمى تىركەلگەن. اۋرۋ ورتاق سۋ قويماسىن پايدالانۋدان كەلگەن. لابوراتوريالىق زەرتتەۋ جۇمىستارى جۇرگىزىلگەننەن كەيىن، قۇستاردىڭ قانداي دياگنوزدان قىرىلعانى بەلگىلى بولدى – ول جوعارى پاتوگەندى قۇس تۇماۋى. مونيتورينگ بارىسىندا جابايى قۇستاردىڭ (اققۋلار مەن ۇيرەكتەردىڭ), قارعالار مەن ساۋىسقانداردىڭ، كوگەرشىندەردىڭ قىرىلعانى انىقتالدى»، - دەدى ءمينيستردىڭ ورىنباسارى.

گۇلميرا يساەۆا پەتروپاۆلداعى ورتالىق باقتا قىرىلعان قارعالار، ساۋىسقاندار مەن كوگەرشىندەر جينالىپ، ورتەلگەنىن جەتكىزدى.

سونداي-اق، ۆيتسە-مينيستر قۇس تۇماۋى سالدارىنان شىعىنعا باتقان شارۋا يەلەرىنە مەملەكەتتەن 400 ملن تەڭگە بولىنەتىنىن مالىمدەدى.

«ەپيزووتياعا قارسى رەسپۋبليكالىق وترياد قىرىلعان قۇس ءۇشىن وتەماقى تولەيتىن رەسمي ۇيىم سانالادى. جىل بويى اكىمدىكتەردە قىرىلعان مال مەن قۇستىڭ نارىقتاعى قۇنىن ايقىنداپ بەرەتىن ارنايى كوميسسيالار جۇمىس ىستەيدى. اكىمدىكتەردىڭ شەشىمىنە سايكەس ەپيزووتياعا قارسى رەسپۋبليكالىق وترياد ايماقتىڭ ۆەتەرينارلىق قىزمەتىنەن كەرەكتى ماتەريالداردىڭ ءبارىن الىپ، قۇسى قىرىلعان ءاربىر شارۋا يەسىنىڭ شوتىنا وتەماقى اۋدارادى. ەگەر قۇجاتتاردىڭ ءبارى دۇرىس بولسا، وتەماقى ءۇش كۇننىڭ ىشىندە ءتۇسۋى كەرەك. بۇگىنگى تاڭدا وتريادتا 390 ملن تەڭگە جيناقتالعان. وسى سوما جەكە شارۋاشىلىقتا باعىلعان جانە قۇس تۇماۋىنان قىرىلعان قۇستاردىڭ باعاسىنىڭ ايقىندالۋىمەن وتەماقى رەتىندە بەرىلەدى»، - دەپ ءتۇسىندىردى گ. يساەۆا.

ەسكە سالا كەتەيىك، قۇس تۇماۋى ەلىمىزدىڭ 5 وبلىسىندا تىركەلدى.

 

 

سوڭعى جاڭالىقتار