21 قىركۇيەك, 12:33 606 0 ايماق انار لەپەسوۆا

قوستانايلىق ديقاندار قامباعا 4 ملن توننادان استام استىق قۇيماق

قوستاناي وبلىسىندا استىق جيناۋ ماۋسىمى اياقتالۋعا جاقىن. بۇل تۋرالى وبلىستىق اۋىل شارۋاشلىعى باسقارماسى حابارلادى.

باسقارما مالىمەتىنشە، قوستاناي وبلىسىنىڭ ديقاندارى قامباعا 4 ملن توننادان استام استىق قۇيۋدى جوسپارلاپ وتىر. وڭىردە بۇگىنگە دەيىن 3 ملن 700 مىڭ گەكتارعا جۋىق القاپ ورىلعان. ازىرگە بيداي ءتۇسىمى ورتا ەسەپپەن گەكتارىنا 10 تسەنتنەردەن كەلۋدە. جەكەلەي العاندا جانگەلدين، مەڭدىقارا جانە قوستاناي اۋداندارىنىڭ كورسەتكىشتەرى جوعارى. بۇل اۋدانداردا وراق ناۋقانى اياقتالدى.

«شارۋالاردىڭ جۇمىسىنا تولاسسىز جاۋعان جاڭبىر ايتارلىقتاي اسەر ەتىپ، استىق جيناۋدىڭ مەرزىمىن كەشەۋىلدەتتى. وسى جىلى ايماقتى 4,1 ملن گەكتار القاپقا ءداندى داقىل ەگىلدى. ونىڭ 84,8%-ءى – بيداي، ال 640,5 مىڭ گەكتار جەرگە مايلى داقىلدار سىڭىرىلگەن. استىق القاپتارىنىڭ شىعىمدىلىعى ورتاشا ەسەپپەن ءار گەكتارعا ءبىر توننادان اينالادى. بۇل تۇرعىدا سارىكول اۋدانىنىڭ ديقاندارى كوش باستاپ تۇر، وندا استىقتىڭ ورتاشا ونىمدىلىگى 13 تس/گا-عا جەتتى، ولاردان ۇزىنكول (12,5 تس/گا) جانە فەدوروۆ (12,4 تس/گا) اۋداندارى ءبىرشاما تومەن.

بيىل قوستاناي وبلىسى داقىلداردى ءارتاراپ تاندىرۋ بويىنشا جوعارعى كورسەتكىشكە قول جەتكىزىپ وتىر. وبلىستاعى مايلى داقىل كولەمى وتكەن جىلعىدان 130,4 مىڭ گەكتارعا ارتىق. القاپتاردى ءارتاراپتاندىرۋ شەڭبەرىندە وڭىردە سوڭعى 4 جىل ىشىندە مايلى داقىلدار القابى 289,1 مىڭ گەكتارعا ۇلعايعان. بۇگىندە وبلىستىڭ ەگىن القاپتارىندا 9 مىڭنان استام كومباين تولاسسىز جۇمىس ىستەپ جاتىر»، دەلىنگەن باسقارما اقپاراتىندا.

قوستاناي استىعىنىڭ نەگىزگى قورىن سولتۇستىك اۋداندار بەرەدى. بۇل وڭىردەگى ءىرى شارۋاشىلىقتاردىڭ ءبىرى – «قارقىن» اگروفيرماسى. سەرىكتەستىك باسشىسى ەرلان بۇقانوۆتىڭ سوزىنشە، بۇگىنگە دەيىن شارۋاشىلىق استىقتىڭ جارتىسىنان كوبىن جيناپ العان.

«شىلدەدە باستالعان اپتاپ ىستىقتان استىق تەز جەتىلگەنىن بايقاۋعا بولادى. سوندىقتان وبلىستا وراق ناۋقانى جىلداعىدان ەرتە باستالدى. باستاپقىدا ناۋقانعا قارقىندى كىرىسكەن ەدىك، بىراق، ءبىر اپتا بويى جاۋعان جاڭبىر كەدەرگى بولىپ، تەحنيكا توقتاپ قالدى. دەگەنمەن قازىر ءبىراز جۇمىستى ەڭسەردىك»، - دەيدى ول.

 

سوڭعى جاڭالىقتار