17 قىركۇيەك, 13:44 538 0 ءبىلىم انار لەپەسوۆا

ونلاين وقىتۋدىڭ ماشاقاتى: سەناتور پرەمەر-مينيسترگە دەپۋتاتتىق ساۋال جولدادى

سەنات دەپۋتاتى مۇحتار قۇل-مۇحاممەد قاشىقتان وقىتۋ كەزىندە تۋىنداعان ماسەلەلەرگە قاتىستى ۇكىمەت باسشىسىنىڭ اتىنا دەپۋتاتتىق ساۋال جولدادى. 

ءوز ساۋالىندا دەپۋتات قاشىقتان وقىتۋعا قاتىستى وزەكتى ماسەلەلەردى كوتەرگەن. سەناتور وتاندىق ونلاين ءبىلىم بەرۋ پلاتفورمالارىنا ورتاق كەمشىلىك رەتىندە ولاردىڭ جۇمىس ىستەۋ جىلدامدىعىنىڭ تومەندىگىن ايتتى.

مۇحتار قۇل-مۇحاممەدتىڭ ايتۋىنشا، ينتەرنەت-ترافيكتىڭ ءدال سونداي كولەمىمەن شەتەلدىك ونلاين رەسۋرستار مەن قوسىمشالار اناعۇرلىم تەز جۇمىس ىستەيدى. وسىعان وراي دەپۋتات جاڭا ونلاين ءبىلىم پلاتفورماسىن ازىرلەگەن كەزدە وسى ماسەلەنىڭ ەسكەرىلگەنى ورىندى ەكەنىن اتاپ ءوتتى.

بۇدان بولەك، ساۋالدا قاشىقتان وقىتۋ بارىسىندا، اسىرەسە، شەتەلدىك قوسىمشالاردى پايدالانعان كەزدە بالالاردىڭ قاۋىپسىزدىگىن قامتاماسىز ەتۋ، جات بەينەجازبالاردىڭ تاراپ كەتپەۋىنىڭ الدىن الۋ، كەزەكشى سىنىپتاردى ۇيىمداستىرۋ جانە ءبىلىم الۋ ۇدەرىسىنە ءماجبۇرلى تۇردە قاتىسا الماي وتىرعان از قامتىلعان وتباسىلار بالالارىنىڭ سانىنا تالداۋ جۇرگىزۋ جۇمىستارىنا باسا ءمان بەرىلگەن.

«ونلاين ءبىلىم بەرۋ پلاتفورماسىن قۇرۋعا مۇددەلى مەملەكەتتىك ورگانداردىڭ ءوزارا ءىس-قيمىلى ايقىندالدى ما؟ پروتسەستى جىلدامداتۋعا تەحنيكالىق مۇمكىندىكتەر بار ما؟ بۇل جۇمىسقا بيۋدجەتتەن قوسىمشا شىعىندار قاراستىرىلعان با؟ قاشىقتان وقىتۋ اياسىندا ازاماتتاردىڭ تەگىن ورتا ءبىلىم الۋى ءۇشىن كونستيتۋتسيالىق كەپىلدىكتەر قامتاماسىز ەتىلگەن بە؟»، – دەدى مۇحتار قۇل-مۇحاممەد.

ەسكە سالا كەتەيىك، بۇدان بۇرىن پارلامەنت ءماجىلىسىنىڭ جالپى وتىرىسىندا دەپۋتات يرينا سميرنوۆا قاشىقتان وقىتۋ فورماتىنىڭ تيىمدىلىگىنە كۇدىك كەلتىرىپ، پرەمەر-ءمينيستردىڭ اتىنا دەپۋتاتتىق ساۋال جولداعان ەدى.

دەپۋتاتتىڭ ايتۋىنشا، بۇرىن سانيتارلىق نورمالاردى ساقتاۋ وڭاي بولعان جوق. سەبەبى زامان باسقا، ەلدىڭ جاعدايى دا باسقاشا ەدى. ال قازىرگى كەزدە قاۋىپسىزدىكتى بارىنشا قامتاماسىز ەتۋگە بولادى. وعان بارلىق مۇمكىندىك بار. سوعان قاراماستان، مەكتەپتەر مەن جوعارى وقۋ ورىندارى كوبىنەسە قاشىقتان جۇمىس ىستەيدى. وسىنىڭ سالدارىنان ءبىلىمنىڭ ساپاسى تومەندەدى.

ال قر پرەمەر-ءمينيسترىنىڭ ورىنباسارى ەرالى توعجانوۆتىڭ سوزىنشە,  قاشىقتان وقىتۋ – بالالار مەن ۇستازداردىڭ دەنساۋلىعىن ساقتاۋ ماقساتىندا قابىلدانعان شەشىم. ۇكىمەت باسشىسىنىڭ ورىنباسارى ەلىمىزدەگى ەپيدەميولوگيالىق احۋالدىڭ وڭالعانىن العا تارتىپ، ىندەتپەن كۇرەستە قابىلدانعان شەشىمدەردىڭ اقتالعانىن ايتتى.

سوڭعى جاڭالىقتار