16 قىركۇيەك, 19:17 448 0 جاڭالىقتار اسىل تۇمار

ەلىمىزدە كيبەر-شابۋىلدان قورعانۋعا مۇمكىندىك بەرەتىن الاڭ قۇرىلدى

سۋرەت عالامتوردان الىندى
سۋرەت عالامتوردان الىندى

OnlineMektep ءبىلىم بەرۋ پلاتفورماسى مەن ZOOM جۇيەسىنىڭ ينتەگراتسياسى جاسىرىن كيبەر-بۇزاقىلاردىڭ شابۋىلدارىنان قورعانۋعا جانە پورتال قولدانۋشىلارىنىڭ تانىمال حالىقارالىق ۆيدەو-كونفەرەنتسيا قىزمەتىن تەگىن پايدالانۋىنا مۇمكىندىك بەرەدى. بۇل تۋرالى كارانتين جاعدايىندا ەلىمىزدەگى مەكتەپتەردە قاشىقتان وقىتۋدى ۇيىمداستىرۋ ماسەلەلەرى جونىندە ورتالىق كوممۋنيكاتسيالار قىزمەتىندە وتكەن ءباسپاسوز-كونفەرەنتسياسىندا ايتىلدى.

بارىمىزگە بەلگىلى، كوكتەمدە COVID-19 پاندەمياسىنىڭ تارالۋىنا بايلانىستى قازاقستاندىق مەكتەپتەر جاپپاي قاشىقتان وقىتۋ جۇيەسىنە كوشتى. مۇعالىمدەر مەن وقۋشىلار وقۋ جىلىنىڭ IV توقسانىن قاشىقتان وقىپ، كوپشىلىگى جاڭا وقۋ جىلىن دا وسى فورماتتا جالعاستىرىپ جاتىر. بىراق ەرىكسىز مىندەتتەلگەن قاشىقتان وقىتۋ فورماتى تۋرالى نەگىزسىز پىكىرلەر قالىپتاسىپ، ءتۇرلى قيىندىقتار تۋىندادى. قاشىقتان وقىتۋ جۇيەسىنىڭ جۇمىسى قالاي جۇرەدى جانە ونى كىمدەر ۇيىمداستىرادى؟ كونتەنت پەن وقىتۋ ادىستەمەسىنىڭ قانداي تۇرلەرى قولدانىلادى؟ كيبەر-بۇزاقىلاردىڭ شابۋىلدارىنان قورعانۋدىڭ جولدارى قانداي؟

قاشىقتان وقىتۋدى ۇيىمداستىرۋ جانە ونىڭ ادىستەمەلىك ءارى تەحنيكالىق ەرەكشەلىكتەرى توڭىرەگىندە وسى جانە وزگە دە سۇراقتارعا قازاقستاندىق پەداگوگتار مەن وقۋشىلار اراسىندا كەڭ قولدانىسقا يە OnlineMektep.org ءبىلىم بەرۋ پلاتفورماسىنىڭ ماماندارى جاۋاپ بەردى. بريفينگكە ءتۇرلى پلاتفورما مەن جاڭا تەحنولوگيالىق قۇرالداردى بەلسەندى پايدالانىپ جۇرگەن ەلوردا مەن وزگە ايماقتارداعى مەكتەپ مۇعالىمدەرى قاتىستى.

ءباسپاسوز جيىنىنا قاتىسۋشىلار OnlineMektep.org پلاتفورماسىندا ءار سىنىپقا جەكە ساباق كەستەسىن قۇرۋ، ارنايى دايىندالعان كونتەنت كومەگىمەن وقىتۋدىڭ ءتيىمدى جولدارىن ۇيىمداستىرۋ، بەينە-ساباقتار وتكىزۋ، وعان قوسا، ءۇي تاپسىرماسىن بەرۋ جانە ونى تەكسەرۋ، مۇعالىم مەن وقۋشى بايلانىسىن قامتاماسىز ەتۋگە قاتىستى اقپارات بەرىپ، پورتال جۇمىسىمەن تانىستىردى.

جيىن بارىسىندا جوبا ماماندارى OnlineMektep پورتالى مەن الەمدە ۆيدەو-كونفەرەنتسيا قىزمەتىن ۇيىمداستىرۋ بويىنشا وتە تانىمال ZOOM پلاتفورماسىنىڭ ينتەگراتسياسى جاسالىپ جاتقانىن مالىمدەدى. مۇنداي ينتەگراتسيا قازاقستاندىق مۇعالىمدەر مەن وقۋشىلاردىڭ ZOOM مۇمكىندىكتەرىن تەگىن پايدالانىپ، سونداي-اق، كيبەر-بۇزاقىلاردىڭ شابۋىلدارىنان ساقتانۋىن قامتاماسىز ەتەدى.

بۇل الەۋمەتتىك جوبا بولعاندىقتان ماماندار پلاتفورما قىزمەتىنە (جۇمىسىنا) قىزىعۋشىلىق تانىتقان ءار ادامنىڭ سۇراعىنا جاۋاپ بەرىپ، پىكىرىن تىڭداۋعا دايىن ەكەندەرىن جەتكىزدى.

سوڭعى جاڭالىقتار