16 قىركۇيەك, 15:07 496 0 جاھان ارايلىم بيمەنديەۆا

يزرايلدە ءال-ءفارابيدىڭ ەسكەرتكىش تاقتاسى اشىلدى

حايفا قالاسىندا ۇلى دالا فيلوسوفى ءابۋ ناسىر ءال-ءفارابيدىڭ تۋعانىنا 1 150 جىل تولۋىنا وراي ونىڭ ەسىمىمەن اتالاتىن كوشەدە ەسكەرتكىش تاقتايشاcى اشىلدى.

سالتاناتتى شارادا قازاقستاننىڭ يزرايلدەگى ەلشىسى ساتىبالدى بۇرشاقوۆ ءال-ءفارابيدىڭ ۇلى مۇراسى، ونىڭ فيلوسوفيا، مەديتسينا، قۇقىقتانۋ، پسيحولوگيا، كوسمولوگيا جانە باسقا دا سالالاردىڭ دامۋىنا قوسقان ۇلەسى تۋرالى ايتا كەلىپ،  ەسكەرتكىش تاقتانىڭ اشىلۋى ەكى ەل اراسىنداعى مادەني بايلانىستى ودان ءارى نىعايتا تۇسەتىنىن اتاپ ءوتتى.

حايفا قالاسى مەرىنىڭ ورىنباسارى لازار كاپلۋن ءوز سوزىندە ءال-فارابي كوشەسىنە ورناتىلعان ەسكەرتكىش تاقتا قالاداعى اراب جانە ەۆرەي كۆارتالدارى تۇيىسكەن جەردە ورنالاسۋىنىڭ ءوزى مادەنيەتتەر بىرلىگىن بىلدىرەتىنىن جەتكىزدى.

ءال-فارابي كوشەسى 1960 جىلى حايفانىڭ اراب كۆارتالىندا اشىلعان. ول ايگىلى باحاي باقتارى مەن حايفا ونەر مۇراجايىنا جاقىن ماڭىنداعى تاريحي اۋداندا ورنالاسقان. ونىڭ ۇزىندىعى 1,5 كم قۇرايدى.

سوڭعى جاڭالىقتار