16 قىركۇيەك, 12:30 432 0 ايماق ءدىلدا ۋاليبەك

تۇركىستاندا جىل سوڭىنا دەيىن 7 كاسىپورىن ىسكە قوسىلادى

تۇركىستان وبلىسىنداعى يندۋستريالدى ايماقتا جىل سوڭىنا دەيىن جالپى قۇنى 2,6 ملرد تەڭگە بولاتىن 7 جوبا ىسكە اسىرىلادى، – دەپ حابارلايدى وڭىرلىك كوممۋنيكاتسيالار قىزمەتى.

جوسپار جۇزەگە اسقاندا 446 جاڭا جۇمىس ورنى اشىلماق. سونىڭ ءبىرى – جۋىردا عانا وبلىس اكىمى ءو.شوكەەۆتىڭ ارنايى قاتىسۋىمەن ىرگەتاس كاپسۋلاسىن سالۋ ءراسىمى وتكەن «Turkestan Tekstil» بك تىگىن فابريكاسى. جوبانىڭ جالپى قۇنى – 415 ملن تەڭگە. بۇل تۋرالى «Turkistan» يندۋستريالدى ايماقتاردىڭ باسقارۋشى كومپانياسىنىڭ باس ديرەكتورى تالعات قىدىرباەۆ مالىمدەدى.

ونىڭ سوزىنشە، «بەكزات» مولتەك اۋدانىنداعى 40 گەكتار جەردى الىپ جاتقان يندۋستريالدى ايماق 350 گەكتارعا دەيىن ۇلعايتىلادى. «الەمدى الاڭداتقان ىندەتكە بايلانىستى ەلدە جاريالانعان توتەنشە جاعداي مەن كارانتين رەجيمى كاسىپكەرلىك نىساندارىنا ايتارلىقتاي كەرى اسەرىن تىگىزدى. ماسەلەن، جۇمىس ىستەپ تۇرعان مەكەمەلەردى بىلاي قويعاندا، جاڭادان اشىلاتىن كاسىپورىنداردىڭ قۇرىلىس جۇمىستارى باياۋلادى.

دەگەنمەن، جىل سوڭىنا دەيىن عيمارات قۇجاتتارىن زاڭداستىرۋ جاعى قولعا الىنادى. بۇگىندە وسىعان بايلانىستى ءتيىستى جۇمىستار جۇرگىزىلۋدە»، – دەدى ت.الپىسبايۇلى. قازىرگى تاڭدا تۇركىستان قالاسىنداعى يندۋستريالدى ايماقتا جۇمىس ىستەيتىن ازاماتتارعا قولايلى جاعداي جاساۋ ءۇشىن ءتيىستى شارۋالار اتقارىلۋدا. اتاپ ايتقاندا، ايماقتىڭ جولدارى اسفالتتالىپ، ۆەلوجولدارمەن قامتىلۋدا. مۇنى ماماندار جۇمىسشىلاردىڭ ەمىن-ەركىن قاتىناۋىنا وڭ اسەر بەرەتىنىنىمەن بايلانىستىرادى. سونداي-اق، وندا شاعىن فۋتبول الاڭشاسى مەن تەننيس كوردى سالىنىپ، جۇمىسشىلاردىڭ ءتيىستى دەڭگەيدە سالاۋاتتى ءومىر سالتىن ۇستانۋىنا مۇمكىندىك تۋادى.

ايتا كەتسەك، جالپى وبلىستا 9 يندۋستريالدى ايماق بار. ولار تۇركىستان، كەنتاۋ قالالارى مەن ورداباسى، سوزاق، تۇلكىباس، بايدىبەك، قازىعۇرت، شاردارا، ماقتاارال اۋداندارىندا ورنالاسقان. 2019 جىلى اتالعان يندۋستريالدى ايماقتاردا قۇنى 4,3 ملرد تەڭگەنى قۇرايتىن 8 جوبا ىسكە قوسىلىپ، 460 جاڭا جۇمىس ورنى اشىلعان. ناتيجەسىندە ءوڭىر بيۋدجەتىنە 1,2 ملرد تەڭگە سالىق اۋدارىمدارى جاسالىپ، 6,77 ملرد تەڭگەنىڭ ءونىمى وندىرىلگەن. بۇل 2018 جىلمەن سالىستىرعاندا 4 ەسەگە ارتىق.

سوڭعى جاڭالىقتار