15 قىركۇيەك, 12:17 502 0 دەنساۋلىق ارايلىم بيمەنديەۆا

ەمحانا تاڭداۋ ناۋقانى باستالدى

بۇگىننەن باستاپ قازاقستاندا ەمحانا تاڭداۋ ناۋقانى باستالدى. جىل سايىنعى ءداستۇرلى ناۋقان ەكى ايعا سوزىلادى.

«تىركەۋ پروتسەسىنىڭ اۆتوماتتاندىرىلۋى ازاماتتاردى ەمحاناعا «سىرتتاي» تىركەۋ فاكتىلەرىنىڭ الدىن الۋعا كومەكتەسەدى. سونىمەن قاتار، ەركىن تاڭداۋ ءپرينتسيپى بويىنشا ازامات ءوزى تۇرىپ جاتقان ءبىر اكىمشىلىك بىرلىك اۋماعىنداعى ەمدەۋ مەكەمەسىنىڭ بىرىنە تىركەلە الادى. وبلىستىق جانە رەسپۋبليكالىق ماڭىزى بار قالالاردا ءبىر اۋدان ىشىندەگى ەمحانانى تاڭداۋعا بولادى»، – دەدى مەديتسينالىق ساقتاندىرۋ قورى الماتى فيليالىنىڭ ديرەكتورى تىلەۋحان ابىلداەۆ.

ونىڭ ايتۋىنشا، بۇگىنگى تاڭدا الماتى قالاسىندا كەپىلدەندىرىلگەن تەگىن مەديتسينالىق كومەك پاكەتى مەن مەديتسينالىق ساقتاندىرۋ پاكەتى شەڭبەرىندە 74 ەمحانا قىزمەت كورسەتەدى. ونىڭ جارتىسىنا جۋىعى – جەكە مەنشىك.

«تىركەۋ ناۋقانى بارىسىندا تەك مەملەكەتتىك قانا ەمەس، جەكە مەنشىك ەمدەۋ ۇيىمدارىنا دا تىركەلۋگە بولادى. تەك تاڭداپ الىنعان كلينيكا مەديتسينالىق ساقتاندىرۋ قورىمەن كەلىسىمشارت بەكىتكەن بولۋى شارت. جەتكىزۋشى كومپانيالاردىڭ تولىق تىزىمىمەن قوردىڭ fms.kz سايتى ارقىلى تانىسۋعا بولادى»، – دەدى فيليال باسشىسى.

ەستەرىڭىزگە سالا كەتسەك، بيىلعى ناۋقان كەزىندە باسقا ەمحاناعا تىركەلگەن تۇرعىندار تاڭداعان ەمحانا قىزمەتىن 2021 جىلدىڭ 1-قاڭتارىنان باستاپ پايدالانا الادى. ياعني، جىلدىڭ سوڭىنا دەيىن بۇرىنعى ەمحاناعا قارالادى.

سوڭعى جاڭالىقتار