6 ماۋسىم 2020, 19:11 925 0 جاڭالىقتار اسىل تۇمار

تۇركىستانعا وزبەكستاننان گۋمانيتارلىق كومەك كەلدى

بۇگىن تۇركىستان قالاسىنا وزبەكستاننان ءۇش جۇك كولىگىنە تيەلگەن گۋمانيتارلىق كومەك كەلدى.

وزبەكستان رەسپۋبليكاسىنىڭ پرەزيدەنتى ش.ميرزيوەۆتىڭ تاپسىرماسى اياسىندا جىبەرىلگەن كەرۋەندى تۇركىستان وبلىسى اكىمىنىڭ ورىنباسارى ساكەن قالقامانوۆ باستاعان توپ قارسى الدى.

ارنايى شاراعا قاتىسقان وزبەكستاننىڭ قازاقستانداعى توتەنشە جانە وكىلەتتى ەلشىسى س.نيازحودجاەۆ سىن ساعاتتاردا باۋىرلاس ەلدەر ءبىر-بىرىنە قولداۋ ءبىلدىرۋ قاجەتتىگىن ايتتى. ونىڭ سوزىنشە، كومەك كەرۋەنىندە 150 مىڭ مەديتسينالىق بەتپەردە، 2500 قورعانىس كيىمى، 150 مىڭ مەديتسينالىق قولعاپ، 1000 تەرمومەتر جانە 440 كەرەۋەت بار.

كورشى ەلدەن كەلگەن كومەككە وبلىس اكىمىنىڭ ورىنباسارى ساكەن قالقامانوۆ العىس ايتىپ، ريزاشىلىعىن ءبىلدىردى. اتالعان كومەك الداعى ۋاقىتتا تۇركىستان وبلىسىنىڭ بارلىق مەديتسينالىق مەكەمەلەرىنە ۇلەستىرىلمەك.

ايتا كەتەيىك، بۇعان دەيىن سۋ تاسقىنى ورىن العان ماقتاارال اۋدانىنا دا وزبەكستاننان كومەك قولى جەتكەن بولاتىن. كورشى ەلدىڭ ازاماتتارى ەلدىمەكەندەردە سۋ سورۋ جۇمىستارىن جۇرگىزىپ، اۋماقتى كۇل-قوقىستاردان تازارتقان بولاتىن.

سوڭعى جاڭالىقتار