6 ماۋسىم 2020, 09:47 1615 0 جاڭالىقتار اسىل تۇمار

پوليتسيا ءبولىمى باسشىسىنىڭ ورىنباسارى شەتەلدىكتەردەن پارا سۇراعانى ءۇشىن سوتتالدى

سۋرەت عالامتوردان الىندى
سۋرەت عالامتوردان الىندى

سولتۇستىك قازاقستان وبلىسى شال اقىن اۋداندىق پوليتسيا ءبولىمى باستىعىنىڭ ورىنباسارىنا قاتىستى سوت ۇكىمى شىقتى.

سقو سىبايلاس جەمقورلىققا قارسى قىزمەتتىڭ مالىمەتىنشە، ءتارتىپ ساقشىسى توتەنشە جاعداي رەجيمى ۋاقىتىندا كاسىپكەر مەن ودان بيداي ساتىپ الۋعا كەلگەن شەتەلدىك ازاماتتاردىڭ اۋدان اۋماعىندا كەدەرگىسىز ءجۇرىپ-تۇرۋى ءۇشىن 1,3 ملن تەڭگە پارا العان.

قازاقپاراتتىڭ جازۋىنشا، ءساۋىر ايىندا ءتارتىپ ساقشىلارى شەتەلدىكتەردى بلوكپوستا توقتاتىپ، اۋداندىق پوليتسيا بولىمىنە جەتكىزگەن. كاسىپكەر وسى ماسەلەگە قاتىستى اۋداندىق پوليتسيا ءبولىمى باستىعىنىڭ ورىنباسارىنان كومەك سۇراعان. ەكس-ورىنباسار ءبارىن ءبىلىپ بەرۋگە ۋادە ەتەدى. ەكىنشى كۇنى ول شەتەلدىكتەردى جىبەرگەنىن ەستىپ، بۇدان وڭاي پايدا تاپپاق بولادى. كاسىپكەردەن شەتەل ازاماتتارىن بوساتقانى ءۇشىن 300 مىڭ تەڭگە تالاپ ەتەدى. كاسىپكەر اقشانى بەرۋگە كەلىسىپ، بولاشاقتا ارىپتەستەرىنىڭ كەدەرگىسىز قالاي جۇرە الاتىندىعىن سۇراعان.

«كۇدىكتىنىڭ وعان قۇزىرى جەتپەسە دە، كاسىپكەردى الداپ، 1 ملن تەڭگە سۇراعان. ايتۋىنشا، بۇل اقشانى ول تىكەلەي باسشىسىمەن بولىسپەك بولعان. سولايشا پارا بەرۋگە ارانداتقان»، – دەيدى سقو سىبايلاس جەمقورلىققا قارسى قىزمەتتىڭ جەتەكشىسى ەرنار بايانعازين.

4 ماۋسىم كۇنى ءبىرىنشى ينستانتسيالى سوت بۇرىنعى پوليتسەيدى كىنالى دەپ تاۋىپ، 3 جىل 6 ايعا جازا كەستى. سونداي-اق ءومىر بويىنا مەملەكەتتىك قىزمەتتە لاۋازىمدى يەلەنۋ قۇقىعىنان ايىردى.

سوت ۇكىمى زاڭدى كۇشىنە ەنگەن جوق.

سوڭعى جاڭالىقتار