29 مامىر 2020, 16:46 729 0 اتاجۇرت باقىتبەك قادىر

مۇگەدەكتىگىن دالەلدەي الماي ءجۇر

باقىتگۇل عيباداتقىزى – ءۇش قىز اسىراپ وتىرعان جالعىزباستى انا. 1992 جىلى موڭعوليادان كوشىپ كەلگەن. قازىر الماتى وبلىسى، جامبىل اۋدانى قارعالى اۋىلىندا تۋىسقاندارىنىڭ شاتىرىندا تۇرىپ جاتىر. قانداسىمىزدىڭ قازىرگى جاعدايى اۋىر. پاتەردەن-پاتەرگە كوشىپ ءجۇرىپ جۇقپالى دەرتكە شالدىققان. قوس وكپەسىن قولىنا ۇستاعان باقىتگۇلدى اۋرۋمەن قاتار، الەۋمەتتىك تۇرمىس-تىرشىلىك تە سارساڭعا سالىپ وتىر.

– قادىرلى وتانداستار جانە قۇزىرلى ورىنداعى باسشىلار، امالسىزدان سىزدەردەن كومەك سۇراپ وتىرمىن. مەن قازىرگى ۋاقىتتا تۋبەركۋلەز اۋرۋى بويىنشا تىزىمدە تۇرمىن. ەكى جىلداي ۋاقىت بولدى. اللاعا شۇكىر، قازىر ءتاۋىرمىن. كەزىندە وتە اۋىر حالدە اۋرۋحاناعا ءتۇستىم. 8 اي اۋرۋحانادا جاتىپ، ەمدەلىپ شىق­تىم. جۇمىسقا جارامسىز دەپ تانىدى. ءدارى­گەرىم مۇگەدەكتىكتى راسىمدەيتىن قۇجاتتار جينات­تى.

جامبىل اۋدانىنداعى مەملەكەتتىك الەۋ­مەتتىك ساراپتاماعا ء(ماس-كە) بارىپ ەدىم، مۇگەدەكتىكتى راستايتىن انىقتامانى بەرمەدى. سونىمەن ءبىر جىلدا ءماس-كە ءتورت رەت باردىم. ولار ونداي انىقتامانى ماعان بەرۋدەن ءۇزىلدى-كەسىلدى باس تارتتى. نەبىر سىلتاۋلارىن ايتىپ، شىعارىپ سالادى. رەنتگەن قاعازىن كوردى، وكپەنىڭ قانداي جاعدايدا ەكەنىن ءبىلىپ وتىر. وپەراتسيا جاساۋعا دا كەلمەيدى. الايدا ءماس قىزمەتكەرلەرى وپەراتسيا جاسالعان جاع­دايدا عانا مۇگەدەكتىك تاعايىندالادى دەيدى. بۇل نە سۇمدىق؟ ونسىز دا ەكى وكپەم ءبىر­دەي فيبروز بولا تۇرا ماعان مۇگەدەكتىك نەگە بەرىل­مەيتىنىن تۇسىنبەدىم، – دەيدى باقىت­گۇل بار­­ماعان جەر، قاقپاعان ەسىگى قالماعانىن ايتىپ.

اتاپ ايتقاندا، ەڭبەك جانە حالىقتى الەۋمەتتىك قورعاۋ مينيسترلىگى جانە كوشى-قون كوميتەتىنىڭ الماتى وبلىسى بويىنشا دەپارتا­مەنتىنە، اۋداندىق Nur Otan پارتيا بولىمىنە حات جازعان كورىنەدى. قۇزىرلى ورىنداردان كەلگەن جاۋاپتا، بۇل ءىستى جەرگىلىكتى ءماس شەشەدى دەپتى. ال جامبىل اۋدانىنىڭ ءماس قىزمەتكەرلەرى (سول كەزدەگى كوميسسيا مۇشەلەرى زاۋرەش ۇلانقىزى جانە ەربول تولەپبەرگەنۇلى) قانشا بارىپ، ارىزدانسا دا، وعان ونداي انىقتاما بەرمەيتىنىن ايتقان.

– سوڭعى ايتقاندارى، ەگەر قول-اياعىڭ اۋزىڭا جەتپەي، تاماق ىشە الماي، جاعدايىڭ قيىنداسا عانا مۇگەدەكتىكتى راستايىن انىق­تامانى بەرەمىز دەيدى. تىپتەن ءماس-ءتىڭ شەشى­مى­نە مەنى ەمدەپ جۇرگەن دارىگەرىم دە اڭ-تاڭ. تۋبەركۋلەز دەگەن جۇقپالى اۋرۋ. جۇمىس ءىس­تەي­­مىن دەپ باسقالارعا جۇقتىرىپ الماي­مىن با دەپ تە الاڭدايمىن.

قازىرگى ۋاقىتتا دەمالۋ پروتسەسىن 50 پايىز عانا ىستەيدى. ۇيدەگى مايدا-شۇيدە جۇمىستى ىستەگەنگە ەكى وكپەم اۋزىما تىعىلىپ، اۋا جەتپەي قالادى. وسىدان كەيىن مەنى كىم جۇمىسقا الادى؟  ەشكىمگە قول جايماي-اق، سول مۇگەدەكتىكتى الماي-اق ءومىر سۇرەرمىن دەپ ءجۇر ەدىم. ول ءۇمىتىم دە سۋ سەپكەندەي باسىلدى. ويتكەنى مەن ءبىر-ەكى اپتا بۇرىن قاتتى دەمىكپە بولىپ اۋىرىپ، تەراپەۆتكە باردىم. سويتسەم دارىگەرىم سوسىلمالى اۋرۋ بويىنشا تىزىمگە الامىز دەيدى. ءبىر وكپە ىستەمەگەننەن، ەكىنشى وكپەگە كۇش ءتۇسىپ، دەمىگۋ پايدا بولادى ەكەن. بىرىنەن قۇتىلسام، ەكىنشى دەرت مەڭدەپ الدى. دۇرىستاپ دەمالا دا المايمىن، ەشكىمگە دۇرىستاپ ءتۇسىندىرىپ دە ايتا المايمىن، ءويت­كەنى تۋبەركۋلەز اۋرۋىمەن اۋىراتىندارعا قو­عام­نىڭ كوزقاراسى بەلگىلى. ءوز تۋعان-تۋى­سىڭ دا شەتتەتەدى. بۇل دا ماعان اۋىر ءتيىپ وتىر.

ءسوز سوڭىندا سىزدەردەن سۇرارىم مۇگەدەك­تىكتى ءادىل، زاڭدى جولمەن الۋىما كومەكتەس­سەڭىزدەر، – دەيدى باقىتگۇل قيباداتقىزى.

ارينە، جاپ-جاس ادامعا مۇگەدەك بولىپ ۇيدە وتىرۋ دا وڭاي ەمەس. بىراق باقىتگۇلگە بۇدان وزگە وڭتايلى جولى بولماي وتىر.

مۇنداي جۇقپالى دەرتكە ۇشىراعان ادام­داردىڭ قۇقىعىن كىم قورعايدى؟

ويتكەنى باقىتگۇلدىڭ ايتۋىنا قاراعاندا، قازىر ولارعا ەشكىم پاتەرىن جالعا بەرمەيدى. جالعا بەرگەن جاعدايدا شىعارىپ جىبەرەدى. سەبەبى بەلگىلى.

سوڭعى جاڭالىقتار