29 مامىر 2020, 16:05 1270 0 قاۋىپسىزدىك انار لەپەسوۆا

تۇراق ءۇشىن تارتىس: الماتىداعى «سارىارقا» بازارىندا اتىس بولدى

الماتىدا التىنسارين مەن ۇلىقبەك كوشەلەرىنىڭ قيىلىسىندا ورنالاسقان «سارىارقا» بازارىندا اتىس بولدى.

قالا تۇرعىندارى تاپا تال تۇستە وق اتىلعانى تۋرالى الەۋمەتتىك جەلىدە جاريالادى.

«27 مامىردا تاپا تال تۇستە «سارىارقا» بازارىندا اتىس بولدى. ول كولىك تۇراعى ءۇشىن بولعان جانجالدان تۋىنداعان سياقتى»، - دەلىنگەن حابارلامادا.

قالالىق پوليتسيا دەپارتامەنتى ءباسپاسوز قىزمەتىنىڭ حابارلاۋىنشا، وقيعا 27 مامىردا تۇسكى ساعات 13:00 شاماسىندا بولعان.

«102 نومىرىنە حابارلاما تۇسكەن سوڭ جەدەل تەرگەۋ توبى وقيعا ورنىنا اتتاندى. بازار كۇزەتشىسى، تۇراق تولەمىن قابىلدايتىن قىزمەتكەر مەن ساۋدا ورىندارىن جالعا العان ساۋداگەرلەر تۇراق اقىسىنا قاتىستى سوزگە كەلىپ قالعان. داۋدىڭ ارتى جانجالعا ۇلاسىپ، وق اتىلعان»، - دەدى پد ءباسپاسوز قىزمەتى.

پوليتسيا كۇدىكتىلەردى بىردەن ۇستاعان.

«بۇل دەرەكتى اۋەزوۆ اۋداندىق پوليتسيا ءبولىمى قر قك 293-بابىنىڭ 3-تارماعى بويىنشا سوتقا دەيىنگى تەرگەۋ رەەسترىنە تىركەدى. گازبەن اتاتىن تاپانشا تاركىلەنىپ الىنىپ، بالليستيكالىق ساراپتاماعا جىبەرىلدى. قىلمىستىق ءىس اياسىندا سوت-مەديتسينالىق ساراپتاما تاعايىندالدى. سوعان سايكەس جاراقات العان ادامداردىڭ دەنساۋلىعىنا كەلتىرىلگەن زيان دارەجەسى انىقتالاتىن بولادى»، -دەدى پوليتسيا دەپارتامەنتىنىڭ ءباسپاسوز قىزمەتى.

 

سوڭعى جاڭالىقتار