28 مامىر 2020, 20:30 1174 0 تۇلعا انار لەپەسوۆا

كەڭەسباي مۇساەۆ دۇنيەدەن ءوتتى

تانىمال تۇركولوگ، ۇلتتىق عىلىم اكادەمياسىنىڭ اكادەميگى، پروفەسسور كەڭەسباي مۇساەۆ 89 جاسىندا دۇنيەدەن وزدى، دەپ حابارلايدى  «Egemen Qazaqstan» گازەتى.

كەڭەسباي مۇساەۆ تۇركىستان وبلىسىنا قاراستى سوزاق اۋدانىندا تۋعان. ماسكەۋدە جارتى عاسىرعا جۋىق جەمىستى ەڭبەك ەتىپ، 320-دان استام عىلىمي ەڭبەك جاريالادى. ونىڭ ىشىندە تۇركولوگيا ماسەلەلەرىنە ارنالعان 14 كىتاپتىڭ اۆتورى، «پاراسات» وردەنىنىڭ يەگەرى. 2004 جىلى رەسەي فەدەراتسياسىنىڭ عىلىمعا ەڭبەگى سىڭگەن قايراتكەرى اتاعى بەرىلگەن.

سونىمەن قاتار ول «تۇرىك ءتىلى» قوعامىنىڭ قۇرمەتتى مۇشەسى جانە ماسكەۋدەگى «قازاق ءتىلى» قوعامىنىڭ قۇرمەتتى توراعاسى. عالىم بيىل 24 ناۋرىزدا 89 جاسقا كەلگەن ەدى. ول نەگىزىنەن قىپشاق توبىنداعى تىلدەردىڭ لەكسيكاسىن سالىستىرمالى-تاريحي تۇرعىدا زەرتتەدى. «قارايىم ءتىلىنىڭ گرامماتيكاسى» (1964), «لەكسيكا تيۋركسكيح يازىكوۆ» (1975), «لەكسيكولوگيا تيۋركسكيح يازىكوۆ» (1984), «رازۆيتيە تەرمينولوگي نا يازىكاح سويۋزنىح رەسپۋبليك سسسر» (1986-1987) اتتى ەكى تومدىق ەڭبەكتىڭ جاۋاپتى رەداكتورى بولدى ءارى قازاق تەرمينولوگياسى ءبولىمىن جازدى.

ماسكەۋدەگى «قازاق ءتىلى» قوعامىنىڭ توراعاسى رەتىندە دە تىلگە قىزمەت ەتتى. تۇركىتانۋشىلار، ءتىلشى عالىمدار ونىڭ ەڭبەكتەرىمەن جاقسى تانىس. كەڭەسباي مۇساەۆ مىقتى لەكسيكولوگ، بەلگىلى تۇركىتانۋشى عالىم، قازاق لينگۆيستەرىنىڭ رەسەيدەگى بەلگىلى وكىلى ەدى.

 

سوڭعى جاڭالىقتار