27 Qyrkúıek, 09:51 530 0 Jańalyqtar Asyl TUMAR

Alıment tólemeı júrgen áke páterin satyp, qaryzynan qutyldy

Qostanaı oblysynyń Jitiqara aýdanynda birneshe jyldan beri balasyna alıment tólemegen azamat páterin satýǵa májbúr boldy. Bul jaıynda Qostanaı oblysy jeke sot oryndaýshylarynyń aımaqtyq palatasy málimet taratty.

Er azamat balasyn asyrap-baǵýǵa 1,5 mln teńge qaryz bolyp qalǵan.

«Buryn bul ispen memlekettik sot oryndaýshy aınalysqan bolatyn, keıinnen shaǵymdanǵan kelinshek óz aryzyn qaıtaryp aldy. Onyń burynǵy kúıeýi alımentti ýaqtyly tólep turýǵa ýádet etken, alaıda sózinde turmady. Sosyn ol bizden kómek surap keldi. Men birden jaýapkerdiń turatyn jerin anyqtap, jumys istegen jerlerine suraý salyp, jalaqysynyń qansha ekenin anyqtadym. Úsh jylda qaryz 1,5 mln teńgege jetken», – deıdi sot oryndaýshy Botagóz Ismýrzına.

Aýdan turǵyny biraz ýaqyt vahta ádisimen jumys istegen, qazir Jitiqaraǵa oralyp, altyn óndiretin kompanııada eńbek etip júr. Uzaqqa sozylǵan áńgimeden keıin jaýapker óziniń páterin satyp, qaryzyn tolyq jabatyn bolyp kelisti. Ol dalada qalmaıdy, ýaqytsha ata-anasynyń qolynda turady. Balanyń ákesi budan bylaı alımentti ýaqytynda tólep turýǵa ýáde etti.

«Bir ǵana Jitiqara aýdanynda alımentke qatysty 600 is óndiriste jatyr. Onyń ishinde perzentine alıment tólemeı qashyp júrgen analar da bar. Byltyr osyndaı ananyń bireýin ákimshilik jaýapkershilikke tarttyq. Eki bala ákesimen birge turady. Al bıyl sol ana balalarynyń aldyndaǵy qaryzyn ótemegeni úshin endi qylmystyq jaýapqa tartylyp, shartty jazaǵa kesildi. Qostanaı oblysynda alıment boıynsha 13 500 is qaralyp jatyr, alıment qaryzy 100 mln teńgeden asyp ketken«, – deıdi Qostanaı oblysy jeke sot oryndaýshylary aımaqtyq palatasynyń basshysy Nesibeli Básenova.

Sot oryndaýshylary mundaı isterdi qaraǵanda boryshkerlerge túsinistikpen qaraýǵa tyrysady. Mysaly Botagóz Ismýrzına taıaýda balalaryna 200 myń teńge qaryz bolǵan ákeniń jumysqa ornalasýyna kómektesti. Sonyń arqasynda ol azamat eki aıda búkil qaryzynan qutyldy jáne eki qolǵa bir kúrek tapty.

 

Sońǵy jańalyqtar