23 Qyrkúıek, 21:14 340 0 Jahan Anar LEPESOVA

Prezıdent halyqaralyq eriktiler jylyn jarııalaýdy usyndy

BUU Bas Assambleıasy 75-sessııasynyń jalpy saıası debattarynda sóılegen sózinde Qazaqstan Prezıdenti Qasym-Jomart Toqaev halyqaralyq volonterler jylyn jarııalaýdy usyndy.

Memleket basshysy BUU-ǵa múshe elderdi álemdegi ashtyqty tolyq joıýǵa jolynda kúsh biriktirýge shaqyrdy. Osy oraıda, Qazaqstannyń bastamasymen qurylǵan Azyq-túlik qaýipsizdigi jónindegi Islam uıymy azyq-túlik qorlaryn qurý arqyly aýqymdy halyqaralyq gýmanıtarlyq naýqanǵa óz úlesin qosýǵa daıyn ekendigin basa aıtty.

«Biz birde-bir adamdy, ásirese, daǵdarystyń taýqymetin tartqan áıelderdi, jastardy, balalardy, qarttardy, múgedekterdi qoldaýsyz jáne kómeksiz qaldyrmaý jónindegi mindetimizdi naqtylaýǵa tıispiz. «Urpaqtyń azyp-tozýyna alyp keletin apatty» boldyrmaý úshin bilim berý júıesi tarıhyndaǵy eń úlken toqyraýǵa jol bermeýimiz kerek»,- dedi Qazaqstan Prezıdenti.

Qasym-Jomart Toqaevtyń aıtýynsha, qazirgi zamandaǵy ózekti máselelerdi tıimdi sheshýge azamattyq qoǵam men jeke sektordyń belsendi atsalysýy óte mańyzdy.

«Bıyl volonterlik qozǵalystyń búkil álem halqynyń yntymaqtastyǵyna serpin bergenine kýá boldyq. Eriktilerdiń aıryqsha róliniń belgisi retinde BUU-ǵa Damý maqsatynda volonterlerdi jumyldyrýdyń halyqaralyq jylyn jarııalaýdy usynamyn. Bıyl Qazaqstanda volonterler jyly dep jarııalandy», - dedi Memleket basshysy.

Aıta keteıik, buǵan deıin Qasym-Jomart Toqaev álem elderin koronavırýsqa qarsy vakına ázirleý isin saıasılandyrmaýǵa shaqyrdy.

Memleket basshysynyń BUU Bas Assambleıasy 75-sessııasynyń jalpy saıası debattarynda sóılegen sóziniń tolyq mátinimen myna silteme arqyly tanysýǵa bolady.

 

Sońǵy jańalyqtar