23 Qyrkúıek, 13:44 1637 0 Aımaq Anar LEPESOVA

Qaraǵandy qalasyna jańa ákim taǵaıyndaldy

Qaraǵandynyń jańa ákimi bolyp Ermaǵanbet Bólekpaev taǵaıyndaldy. Al burynǵy qala basshysy Nurlan Áýbákirov basqa jumysqa aýysýyna baılanysty qyzmetinen bosatyldy.

Qaraǵandy qalalyq máslıhatynyń depýtattarymen kelisilgennen keıin oblys ortalyǵynyń jańa basshysyn Jeńis Qasymbek jurtshylyqqa tanystyrdy.

«Ermaǵanbet Qabdolulynyń jumys tájirıbesi mol. Ol óz jobalary men bastamalaryn laıyqty jalǵastyratynyna senimdimin. Nurlan Erikbaıulyna atqarǵan jumysy úshin alǵys aıtamyn. Onyń qalada jumys istegen kezinde kóptegen júıeli máseleler sheshildi. Onyń kópshiligin ol ózi bastap, ózi sheshti. Aýlalarda, qaladaǵy úılerdiń qasbetterinde kóp nárse jasaldy, biraq áli de kóp jumys atqarý kerek», - dedi Jeńis Qasymbek.

«Barshańyzǵa birlesken jumys úshin alǵys aıtqym keledi. Týyp-ósken qalany 6 jyl boıy basqarý - úlken qurmet jáne jaýapkershilik», - dep atap ótti Nurlan Áýbákirov.

Qaraǵandy oblysynyń ákimi jańa qala basshysynyń aldyna birqatar mindetter qoıdy. Atap aıtqanda, kommýnaldyq sıpattaǵy jáne qoǵamdyq kólik máselesin sheshýdi júktedi. Ermaǵanbet Bólekpaev senim artqany úshin alǵysyn jetkizdi.

«Osy kezeńde kóp jumys atqaryldy. Alda áli de aýqymdy jumys kútip tur. Sizdermen birge alǵa qoıylǵan mindetterdi oryndaıtynymyzdy aıtyp, sendirgim keledi», - dep atap ótti ol.

Ermaǵanbet Bólekpaev 1975 jyly 2 qyrkúıekte Qaraǵandy oblysy Shet aýdany Óspen aýylynda dúnıege kelgen. 1996 jyly E.A. Bóketov atyndaǵy Qaraǵandy memlekettik ýnıversıtetiniń ekonomıka fakýltetin bitirgen.

Eńbek jolyn 1996 jyly «Kazkommerbank» AAQ Temirtaý fılıalynda ekonomıst qyzmetinen bastaǵan. 1997 jyldan 1998 jylǵa deıin Astanadaǵy «Bıznes-Inform» IKO ókildiginiń dırektory qyzmetin atqardy. 1998 jyldyń qarasha aıynda ındýstrııa, energetıka jáne saýda mınıstrliginde eksporttyq baqylaý jáne lıenzııalaý departamentiniń bas mamany laýazymynda jumys isteı bastady. 2002 jyly osy vedomstvo bastyǵynyń orynbasary boldy.

2006 jyly Pavlodar oblysy ákimi apparaty basshysynyń orynbasary, 2006 jyldan 2008 jylǵa deıin Pavlodar oblysy Pavlodar aýdanynyń ákimi boldy.

2008 jyldan 2009 jylǵa deıin Pavlodar oblysynyń kásipkerlik jáne ónerkásip basqarmasyn basqardy. QR Memlekettik qyzmet isteri agenttiginiń Qaraǵandy, Ońtústik Qazaqstan oblystary jáne Nur - Sultan qalasy boıynsha aýmaqtyq basqarmasynyń bastyǵy – Tártiptik keńesiniń tóraǵasy laýazymyn atqarǵan.

2013 jyldan 2018 jylǵa deıin Nur-Sultandaǵy «Saryarqa», «Almaty» jáne «Esil» aýdandarynyń ákimi boldy.

2018 jyly Qazaqstan Respýblıkasy Prezıdenti Ákimshiliginiń memlekettik ınspektory bolyp taǵaıyndaldy.

2018 jylǵy qarashadan bastap qazirgi tańǵa deıin Qaraǵandy oblysy ákiminiń orynbasary qyzmetin atqardy.

«Qurmet» ordenimen jáne «Ereń eńbegi úshin» medalimen marapattalǵan.

 

Sońǵy jańalyqtar