17 Qyrkúıek, 13:44 526 0 Bilim Anar LEPESOVA

Onlaın oqytýdyń mashaqaty: Senator Premer-mınıstrge depýtattyq saýal joldady

Senat depýtaty Muhtar Qul-Muhammed qashyqtan oqytý kezinde týyndaǵan máselelerge qatysty Úkimet basshysynyń atyna depýtattyq saýal joldady. 

Óz saýalynda depýtat qashyqtan oqytýǵa qatysty ózekti máselelerdi kótergen. Senator otandyq onlaın bilim berý platformalaryna ortaq kemshilik retinde olardyń jumys isteý jyldamdyǵynyń tómendigin aıtty.

Muhtar Qul-Muhammedtiń aıtýynsha, ınternet-trafıktiń dál sondaı kólemimen sheteldik onlaın resýrstar men qosymshalar anaǵurlym tez jumys isteıdi. Osyǵan oraı depýtat jańa onlaın bilim platformasyn ázirlegen kezde osy máseleniń eskerilgeni oryndy ekenin atap ótti.

Budan bólek, saýalda qashyqtan oqytý barysynda, ásirese, sheteldik qosymshalardy paıdalanǵan kezde balalardyń qaýipsizdigin qamtamasyz etý, jat beınejazbalardyń tarap ketpeýiniń aldyn alý, kezekshi synyptardy uıymdastyrý jáne bilim alý úderisine májbúrli túrde qatysa almaı otyrǵan az qamtylǵan otbasylar balalarynyń sanyna taldaý júrgizý jumystaryna basa mán berilgen.

«Onlaın bilim berý platformasyn qurýǵa múddeli memlekettik organdardyń ózara is-qımyly aıqyndaldy ma? Proesti jyldamdatýǵa tehnıkalyq múmkindikter bar ma? Bul jumysqa bıýdjetten qosymsha shyǵyndar qarastyrylǵan ba? Qashyqtan oqytý aıasynda azamattardyń tegin orta bilim alýy úshin konstıtýııalyq kepildikter qamtamasyz etilgen be?», – dedi Muhtar Qul-Muhammed.

Eske sala keteıik, budan buryn Parlament Májilisiniń jalpy otyrysynda depýtat Irına Smırnova qashyqtan oqytý formatynyń tıimdiligine kúdik keltirip, premer-mınıstrdiń atyna depýtattyq saýal joldaǵan edi.

Depýtattyń aıtýynsha, buryn sanıtarlyq normalardy saqtaý ońaı bolǵan joq. Sebebi zaman basqa, eldiń jaǵdaıy da basqasha edi. Al qazirgi kezde qaýipsizdikti barynsha qamtamasyz etýge bolady. Oǵan barlyq múmkindik bar. Soǵan qaramastan, mektepter men joǵary oqý oryndary kóbinese qashyqtan jumys isteıdi. Osynyń saldarynan bilimniń sapasy tómendedi.

Al QR Premer-mınıstriniń orynbasary Eraly Toǵjanovtyń sózinshe,  qashyqtan oqytý – balalar men ustazdardyń densaýlyǵyn saqtaý maqsatynda qabyldanǵan sheshim. Úkimet basshysynyń orynbasary elimizdegi epıdemıologııalyq ahýaldyń ońalǵanyn alǵa tartyp, indetpen kúreste qabyldanǵan sheshimderdiń aqtalǵanyn aıtty.

Sońǵy jańalyqtar