17 Qyrkúıek, 12:15 429 0 Jańalyqtar Anar LEPESOVA

Prezıdent Qazaqstan mashına jasaýshylarynyń VIII forýmy qatysýshylaryna quttyqtaý hat joldady

Memleket basshysy Qasym-Jomart Toqaev onlaın rejımde ótip jatqan Qazaqstan mashına jasaýshylarynyń VIII forýmy qatysýshylaryna quttyqtaý hat joldady.

Hatty «Qazaqstannyń mashına jasaýshylar odaǵy» zańdy tulǵalar birlestigi basqarmasynyń tóraǵasy Meıram Pishembaev oqyp berdi.

«Qurmetti forým qatysýshylary! Sizderdi Qazaqstan mashına jasaýshylarynyń VIII forýmynyń ashylýymen quttyqtaımyn. Forým memleket pen bıznestiń júıeli dıalogy, mashına jasaý salasynyń ózekti máselelerin sheshý úshin suhbat alańyna aınaldy. Bıyl sharalardyń basym bóligi onlaın rejımde ótip jatyr. Bul forým da solaı ótýde jáne onyń aıasynda I Halyqaralyq mashına jasaý jáne metall óńdeý onlaın-kórmesi ashylǵan. Pandemııamen baılanysty kúrdeli ekonomıkalyq kezeńge qaramastan otandyq mashına jasaý osy jyly 14 paıyzdyq jaqsy ósim qarqynyn kórsetip otyr. Osy kórsetkish boıynsha mashına jasaý eldiń búkil óńdeý sektorynda kóshbasshy orynǵa shyqty. Meniń Joldaýymda naǵyz ártaraptandyrylǵan, tehnologııalyq damyǵan ekonomıkany qurý, óńdeý ónerkásibi óndirisiniń kólemin 1,5 ese arttyrý tapsyrmalary júkteldi», - dep atap ótedi QR Prezıdenti quttyqtaýynda.

Qasym-Jomart Toqaevtyń atap ótýinshe, memleket bul úshin otandyq óndirýshilerdi qoldaý tetikterin jetildirip, ónerkásiptik saıasat týraly zań qabyldanatyn bolady.

«Jańa jaǵdaıdaǵy Qazaqstan mashına jasaý salasy óziniń qarqyndy damýyn jalǵastyratyndyǵyna senimdimin. Salanyń óndiristi keńeıtýge jáne eksportty arttyrýǵa aıtarlyqtaı áleýeti bar. Barlyqtaryńyzǵa jemisti jumys jáne alǵa qoıylǵan maqsattarǵa qol jetkizýdi tileımin!», - dedi Memleket basshysy.

 

Sońǵy jańalyqtar