3 Maýsym 2020, 20:03 619 0 Jańalyqtar Asyl TUMAR

Elbasy tóraǵalyǵymen «Samuryq-Qazyna» ulttyq ál-aýqat qoryn basqarý jónindegi keńestiń otyrysy ótti

Qazaqstannyń Tuńǵysh Prezıdenti – Elbasy Nursultan Nazarbaevtyń tóraǵalyǵymen «Samuryq-Qazyna» ulttyq ál-aýqat qoryn basqarý jónindegi keńestiń otyrysy ótti, – dep jazdy elbasy.kz.

Keńeste «Samuryq-Qazyna» akıonerlik qoǵamynyń qazirgi qyzmeti, shaǵyn jáne orta bıznesti qoldaý boıynsha qabyldanyp jatqan sharalar, sondaı-aq keńestiń ótken otyrysynda berilgen tapsyrmalardyń oryndalý barysy qaraldy. Otyrysty ashqan Nursultan Nazarbaev «Samuryq-Qazyna» qory el damýynda mańyzy ról atqaratynyn atap ótti.

– Bıyl biz aýyr synaqtarǵa tap boldyq. Koronavırýs pandemııasy jahandyq ekonomıkalyq daǵdarysqa ákep soqty. Álemdik ekonomıka men saýda ósimi toqtady. Bul faktorlardyń barlyǵy bizdiń ekonomıkamyzǵa keri áserin tıgizip otyr. Osy oraıda biz qalyptasqan kúrdeli ahýalǵa tez beıimdelýge jáne daǵdarysty eńserýge septigin tıgizetin ekonomıkanyń negizgi draıverlerin aıqyndaýǵa tıispiz, – dedi Elbasy.

Qazaqstannyń Tuńǵysh Prezıdenti memlekettiń ekonomıkalyq ósimdi qalpyna keltirý sharalaryn der kezinde qabyldaǵanyna jáne mańyzdylyǵyna toqtaldy.

– Ekonomıkamyzdy qalpyna keltirýde jáne ári qaraı damytýda ulttyq ál-aýqat qory basty ról atqarady. Qazaqstannyń barlyq negizgi kompanııalary osy Qordyń quramyna kiredi. Qor kompanııalarynyń jıyntyq aktıvteri 28 trln teńgeni quraıdy. Bul – JIÓ-niń 40%-y. Munda 300 myń qyzmetker jumys isteıdi. Qıyndyqtarǵa qaramastan kompanııalardyń bári jumysyn jalǵastyryp jatyr. Ótken jylǵy Qor kórsetkishteriniń ósý qarqyny bıylǵa rezerv qurýǵa múmkindik bergenin baıqap otyrmyz, – dedi Nursultan Nazarbaev.

Jıyn barysynda QR Premer-Mınıstri A.Mamınnyń, «Samuryq-Qazyna» ulttyq ál-aýqat qory» akıonerlik qoǵamynyń basqarma tóraǵasy A.Esimovtiń, «Qazmunaıgaz» ulttyq kompanııasy» akıonerlik qoǵamynyń basqarma tóraǵasy A.Aıdarbaevtyń, «Qazaqstan temir joly» ulttyq kompanııasy» akıonerlik qoǵamynyń basqarma tóraǵasy S.Myńbaevtyń baıandamalary tyńdaldy. Elbasy Qor kompanııalarynyń tıimdiligin ári qaraı arttyrý úshin naqty sharalar qabyldaýdyń mańyzdylyǵyn atap ótti.

Sonymen qatar Qazaqstannyń Tuńǵysh Prezıdenti qor kompanııalaryn jekeshelendirý máselelerine, satyp alýlar jáne otandyq taýaróndirýshilerdi qoldaýda jergilikti úlesti arttyrý boıynsha qabyldanyp jatqan sharalarǵa toqtaldy. Keńes qorytyndysy boıynsha Elbasy «Samuryq-Qazyna» basshylyǵynyń daǵdarysqa qarsy qabyldaǵan sharalarynyń nátıjesin atap ótip, bul tájirıbeni basqa da qurylymdarda qoldanýdyń mańyzdylyǵyna toqtaldy.

– Qor basshylyǵy der kezinde qabyldaǵan sharalardy qoldaımyn jáne oń baǵalaımyn. Olar óz tıimdiligin kórsetti. Daǵdarys kezinde memleket ekonomıkany qoldaý úshin Ulttyq qordan qyrýar qarjy bóldi. Alaıda osy jaǵdaıda «Samuryq-Qazyna», kerisinshe, Ulttyq qorǵa 100 mlrd. teńge baǵyttady, – dedi Qazaqstannyń Tuńǵysh Prezıdenti.

Sońǵy jańalyqtar