3 Maýsym 2020, 11:27 727 0 Jańalyqtar Asyl TUMAR

«Baqytty otbasy»: Qostanaı oblysynda 219 kópbalaly otbasyna baspana beriledi

Qostanaı oblysynda 219 kópbalaly otbasy baspana kiltine ıe bolady. Bul týraly Qostanaı oblysynyń qurylys, sáýlet jáne qala qurylysy basqarmasy habarlama taratty.

Óńirde turǵyn úı qurylysyna aıryqsha mán berilmek. Qarjylandyrý kólemi artyp, az qamtylǵan otbasylardy baspanamen qamtamasyz etý úshin arnaıy jobalar qabyldandy.

Máselen, osy jyly Qostanaı qalasynda halyqtyń áleýmettik osal toptary úshin jalǵa beriletin 7 úıdiń qurylysyna 2 mlrd teńge baǵyttaldy. Amangeldi, Denısov, Jitiqara, Meńdiqara jáne Naýryzym aýdandaryna taǵy 1,2 mlrd teńge bólindi. Bes aýdanda 5 kóppáterli úı qaıta jańartylady. Olardyń bári kópbalaly otbasyna arnalǵan.

«Kópbalaly otbasylardy turǵyn úımen qamtamasyz etý úshin 108 páter satyp alyndy. Bul maqsatta 900 mln teńge qarastyryldy. Onyń ishinde 840 mln teńge Qostanaı qalasynyń enshisinde. «Nurly jer» jáne «Baqytty otbasy» baǵdarlamalary aıasynda az qamtylǵan otbasylar nesıelik úıde turýǵa múmkindik alady. Qazirdiń ózinde 1,5 mlrd teńgege 219 ótinim tústi. Barlyq ótinim maquldandy», – deıdi Qostanaı oblysynyń qurylys, sáýlet jáne qala qurylysy basqarmasynyń basshysy Berik Tańjaryqov.

Qazirgi ýaqytta 36 kópbalaly jáne múgedek balasy bar 28 otbasy páter kiltine ıe boldy.

 

Sońǵy jańalyqtar