2 Maýsym 2020, 10:55 985 0 Jańalyqtar Asyl TUMAR

Jyl sońynda jumyssyzdyq deńgeıi 6,1 paıyzǵa jetýi yqtımal – mınıstr

Sýret ǵalamtordan alyndy
Sýret ǵalamtordan alyndy

Bıyl naýryz-sáýir aıynda elimizde 4 mıllıonnan astam adam jumyssyz qaldy. Bul týraly Úkimet otyrysynda QR Eńbek jáne halyqty áleýmettik qorǵaý mınıstri Birjan Nurymbetov aıtty.

«Koronavırýs indetine baılanysty jarııalanǵan tótenshe jaǵdaıǵa baılanysty eńbek naryǵyndaǵy ahýal kúrdeli boldy. Naýryz-sáýir aılarynda boljam boıynsha tabyssyz, jumyssyz qalǵan azamattar sany 4 mıllıonnan astam boldy. 20 sáýirden bastap karantın sharalarynyń jeńildetilýine baılanysty bul kórsetkish mamyr aıynda 1 mln adamǵa deıin tómendedi dep boljap otyrmyz. Úkimet tarapynan ekonomıkany jańǵyrtý, bıznesti qoldaý, onyń ishinde jumyspen qamtý múmkindikterin keńinen kózdeý nátıjesinde shilde aıynan bastap eńbek naryǵyndaǵy jaǵdaıdyń turaqtanýyna qol jetkizý múmkin dep sanaımyz», – dedi Birjan Nurymbetov.

Mınıstrdiń aıtýynsha, jyl sońynda jumyssyzdyqtyń boljamdy deńgeıi 6,1 paıyzdy quraýy yqtımal.

«Jalpy bıyl 1 mln 220 myń adamdy jumyspen qamtý sharalaryna tartýǵa tolyq múmkindigimiz bar. Oǵan ekonomıkany, bıznesti qoldaý sharalarynyń barynsha jumys oryndaryn saqtap qalý múmkindigi jáne barlyq memlekettik baǵdarlamalar aıasynda jańa jumys oryndaryn qurý áleýeti tolyǵymen paıdalanylatyn bolady. Onyń ishinde jańa Jumyspen qamtýdyń jol kartasy aıasynda 255 myń jumys orny qurylmaq. Búginde jol kartasyna kirgen 6,5 myń jobanyń 5 300 jobasy bastalyp, 103 myń jumys ornyna 91 myń adam tartyldy. Onyń 35 paıyzy – jastar», – dedi Birjan Nurymbetov.

Sońǵy jańalyqtar