2 Maýsym 2020, 10:13 791 0 Jańalyqtar Asyl TUMAR

AQSh-ta ushaq qulap, tórt adam qaza tapty

Dúısenbi kúni AQSh-tyń Illınoıs shtatynda bir motorly shaǵyn ushaqtyń qulaýy saldarynan tórt adam qaza tapty, – dep jazdy QazAqparat ABC News-ke silteme jasap.

Ushaq jergilikti ýaqyt boıynsha shamamen kúndizgi saǵat 3:45-te, Karlınvıll qalasynan ońtústikke qaraı 4,8 shaqyrym jerde belgisiz jaǵdaıda qulaǵan. Jerde apat saldarynan eshkim zardap shekken joq, – dep habarlady jergilikti sherıf Shon Kal.

KSDK.com habarlamasy boıynsha, áýe apatynan qaza tapqan ushqysh pen úsh jolaýshy dos bolyp, bir ýnıversıtette oqyǵan. Jolaýshylardyń biri, Danıel Shedd, ushar aldynda ata-anasyna ushaqtan selfı jasap jibergen. Onyń ákesi Charlz Shedd ushqysh Djoshýa Svırs ushaqty taıaýda ǵana satyp alǵanyn, biraq áýe kemesi «tamasha jaǵdaıda» bolǵanyn, barlyq qajetti tekseristen ótkenin aıtty.

Charlz balasy men dostaryn áýejaıǵa ózi shyǵaryp salǵan. Shedd balasynyń osyndaı shaǵyn ushaqpen eshqashan ushpaǵanyn, biraq dostarymen birge ushýdy taǵatsyzdana kútip júrgenin aıtty.

Ákesi arnaıy qosymsha arqyly ushaqtyń ushýyn baqylaýǵa áreket jasaǵan kezde, odan eshteńe shyqpady, Charlzdiń balasyna jibergen barlyq habarlamalary oǵan jetken joq. Egde jastaǵy er adam oǵan telefon soqqan, alaıda jaýap bolmaǵan. Sodan ol jergilikti polıııaǵa habarlasqan.

Ushaqtyń synyqtary shamamen kúndizgi saǵat 4:30-da Karlınvıll qalasyna jaqyn jerdegi jazyq daladan tabyldy. Dárigerler oqıǵa ornynda barlyq tórt dostyń ólimin belgiledi.

Sońǵy jańalyqtar