«КӨРПЕҢЕ ҚАРАЙ КӨСІЛ»
Серіктің кіндік қаны тамған жер – Аманкелді. Әлі оң-солын жете тани қоймаған бала Серік айналшықтап Әбсаттар атасының қасынан шықпайтын. «Атасының баласы» болатын. Атасы айтқан әңгімелер мен қанатты сөздер баланың жадында жатталып қалды. – Балам, уақыт дегенің қас-қағым сәт. Уақыттың қадірін біл. Өмірден керегіңді алуға тырыс. Ең бірінші керегі – білім. Білімді болуға талпын. Қатарыңнан қалыс қалма. Адал еңбек, маңдай термен тапқан нанның дәмі тіл үйіретін болады. Ертең-ақ ержетіп, үлкен азамат боласың. Қандай биікке шықсаң да, асып-тасыма. Биікке шығу қиын болғанымен, одан құлау оңай. «Болдым-толдым» деп ешуақытта тоқмейілсіме. Адамды аздыратын да, тоздыратын да осы жаман әдет. Көрпеңе қарай көсіл. Осыны есіңде мықтап ұста, – дейтін атасы. Осы кеңестің бәрі күні бүгінге дейін Серіктің есінен әсте шыққан емес. Күнделікті жұмысында атасының айтқандарын қағида ретінде ұстанады. 1973 жылы мектеп табалдырығын аттаған кезде де атасының әңгімелері жадында жаңғырып тұрды. Қатарластарынан қалып қоймауды, кем болмауды ойлады. Сабағын жақсы оқуға тырысты. Білімге құштар болды. Бұл уақытта олар Қызылорда қаласына көшіп келген еді. Серік осы қалада мектеп табалдырығын аттады. Бұл №140 мектеп болатын. Қазір Абылайхан атындағы білім ордасы. Әкесі Итен Қарымсақұлы осы жылдары Отан алдындағы азаматтық борышын өтеп келіп, Қызылорда облыстық «Ленин жолы» (қазіргі «Сыр бойы») газетіне қызметке орналасқан. Ол әскерге дейін де осы газетте еңбек жолын бастаған еді. Тәжірибесі әскер қатарында жүргенде толыға түседі. Әкесі кәсіби журналист. Қазіргі әл-Фараби атындағы Қазақ ұлттық университетінің журналистика факультетін 1966 жылы бітірген. Әскерде взвод командирі болған Итен Қарымсақұлы мамандығынан қол үзбей, округтің «Красный боец» газетінің штаттан тыс тілшісі болады. Ол уақытта кәсіби журналистер тапшы.Мамандарды даярлайтын жоғары оқу орны тек Алматыда ғана. Оны бітірген журналистер жеткілікті емес. Ал жаңадан ашылып жатқан газеттерге білікті де білімді мамандар керек. Оның үстіне Итен Қарымсақұлы редакцияның секретариатында жұмыс істеп, тәжірибе жинақтаған маман. Журналистердің тілімен айтқанда, секретариат – редакцияның штабы. Итен Қарымсақұлы осындай мектептен өткен журналист. Оны жақсы білетін әріптестері жетпісінші жылдардың басында жаңадан ашылған Торғай облыстық «Торғай таңы» газетіне жауапты хатшының орынбасарлығына шақырады. Осы газетте үш жылға жуық абыройлы жұмыс істейді. 1973 жылы 20 наурызда Қазақ КСР Жоғарғы Кеңесі төралқасының Жарлығымен Маңғышлақ және Жезқазған облыстары құрылған болатын. Жаңадан ашылған Жезқазған облысының құрамына Жезқазған, Балқаш, Қаражал қалалары мен Ақтоғай, Жезді, Жезқазған, Жаңарқа, Шет аудандары енді. Сондай-ақ Шет, Жаңарқа аудандары мен Қаражал қаласына қарасты бірнеше елді мекенді біріктірген Ақадыр ауданы пайда болды. Жаңа облыстың өз газеті болуы – заңды. Сол жылы 13 сәуірде «Жезқазған туының» алғашқы нөмірі оқырмандар қолына тиеді. Редакция ары қарай жұмысты жалғастыру үшін жан-жақтан журналистерді шақыра бастайды. Соның бірі – Итен Қарымсақұлы. Жалындап тұрған жас журналист Жезқазған облыстық «Жезқазған туы» газетінің бөлім меңгерушісі әрі редакция алқасының мүшесі болады. Ал сол 1973 жылы бала Серік Қызылорда қаласында мектеп табалдырығын бірінші рет аттаған болатын. – Әкемнің бума-бума газеттерді үйге әкеліп, жата-жастанып оқитыны әлі күнге көз алдымда. Газет-журналдан бас алмайтын. Менің де ежіктеп кітап оқуға шама-шарқым жетіп қалған кез. Әкем ұсынған газеттердегі материалдарды, шала-шарпы түсінсем де, шаршамай-шалдықпай оқитыным есімде. – Газет-журнал көп оқысаң өзіңе жақсы. Жылдам оқуға жаттығасың. Оқи бер, оқи бер, – деп әкем де дем беріп қоятын. – Журналистерге жақын жүретініңіздің себебі осы екен ғой, – деймін мен де қарап тұрмай. – Иә. Оныңыз рас, журналист жора-жолдастарым көп. Оның үстіне бала күнімнен газет-журналға сусындап өскен жоқпын ба?! Сіздерге, журналистерге жақын жүретінім сол. – Әкенің жолын жалғастырған балалары бар ма? – Біздің үйдегі келіні – Садуова Айгүл әдебиетке жақын. Өлең жазады.Қызылорда педагогикалық институтының филология факультетін бітірген. Орыстың атақты ақындарының өлеңдерін қазақ тіліне тәржіма жасаумен айналысады. Былайша айтқанда, хоббиі. Біздің үйде қазір газет-журналды, кітапты көп оқитын сол.«АЛЫС ТА ЖАҚЫН ИНДОНЕЗИЯ»
2012 жылдың 10 наурызы. Бұл күн Серіктің есінен ешқашан шықпайтын шығар. Дәл осы күні «Қазақстан – Индонезия» іскерлік кеңесі құрылып, оның төрағасы болып Серік Қарымсақов сайланған еді. Сол жолы екі мемлекеттің бірқатар министрліктері мен кәсіпкерлік қауымдастықтарының өкілдері бас қосып, іскерлік кеңестің жұмысын жандандыру жөнінде келелі ой-пікір алмасқан болатын. Индонезия Қазақстан үшін маңызды әріптес. Біздің елмен арақашықтығы алыс болса да, жақын мемлекетке айналды. Екі ел арасындағы сауда-экономикалық, мәдени қарым-қатынас жыл өткен сайын айрықша қарқын алып келеді. Индонезияның іскерлік қауымдастығынан қазақстандық кәсіпкерлер үйренетін үрдіс көп. – Индонезияда орта бизнестің үлесі 25 пайыздан асады, – дейді Серік Қарымсақов. – Бұл өте жоғары көрсеткіш. Ел экономикасының өркендеп отырғаны орта бизнестің арқасы. Халқының саны жағынан Индонезия әлемде төртінші орынды иеленетінін ескерсек, олардың көп бөлігі бизнеспен айналысатынын аңдау қиын емес. Бұл тұрғыда Индонезиядан талмай үйренуге болады. Оны Елбасымыз да талай мәрте айтқан болатын. Мемлекет басшысы Нұрсұлтан Назарбаев: «Қазақстан алдына әлемнің ең дамыған отыз елінің қатарына ену міндетін қойды. Өз кезегінде Индонезия экономика аясын ұлғайту және жедел дамыту жөніндегі бас жоспарын қабылдады. Бұл ел 2025 жылға қарай әлемдегі экономикасы ірі он елдің қатарына кіруді көздейді. Осылайша екі ел өзара тиімді ынтымақтастық аясын кеңейтуге және тереңдетуге мүдделі», – деген болатын. Индонезия Қазақстан секілді көп ұлт пен ұлыс өмір сүріп жатқан мемлекет. Халқының саны 260 миллионнан астам. 300-ден көп этникалық топ бар Индонезия тұрғындары 700-ден астам тілде сөйлейді. Бірақ мемлекеттік тіл – индонезия тілі. Осы тілде сөйлеседі, іс-қағаздарын жүргізеді. Тұрғындар арасында алауыздық жоқ. Тыныш, бейбіт, келісті өмір сүріп жатыр. Индонезия дүниежүзіндегі ең көп мұсылман халқы бар мемлекет. – Индонезияда кәсіпкерліктің қай түрі болсын жақсы дамыған. Оған осы елде бірнеше рет болған кезімде көзім айқын жетті. Индонезиядағы кәсіпкерлер адал әрі таза. Бір күндігін емес, болашағын ойлайды. Не жасаса да сапалы жасайды. Олар Қазақстанның жері кең, кенге бай екенін жақсы біледі. Индонезияның да жері бай, халқы бақуатты. Бизнеске ерекше көңіл бөледі. Біздің елде де кәсіпкерлікке мемлекеттік қолдау айрықша екеніне көздері жеткен индонезиялық бизнесмендер бірнеше инвестициялық жобаларды бастауға тас-түйін дайын. Ең басты қиындық – жер шалғай. Бірақ соған қарамастан іскерлік байланыстарды арттыруға мүдделі. Қиын мәселенің бірі – көлік-логистика. Бұл ретте Қазақстан тарапынан нақты қадамдар бар, – дейді «Қазақстан – Индонезия» іскерлік кеңесінің төрағасы Серік Қарымсақов. Индонезия өз тәуелсіздігін 1945 жылы Жапониядан алған болатын. Одан бері – 73 жыл. Индонезияның Қазақстандағы елшілігі осы мерекені біздің елде де атап өтті. Қазақстанмен дипломатиялық қарым-қатынас орнатқанына – ширек ғасыр. Осы жылдар ішінде екі мемлекет арасындағы экономикалық, мәдени және әлеуметтік ынтымақтастық артып келеді. Міне, осындай іскерлік байланыстардың бел ортасында жүрген азамат – Серік Қарымсақов. Ол – осы істердің ұйытқысы, дәнекері. Алғаш рет Мәскеуде Индонезия елшісімен жолыққан болатын. Сол күннен бастап Индонезия мен Қазақстан кәсіпкерлері арасында тығыз, ынтымақты қарым-қатынас орнай бастады. Бұған да ұйытқы болған Серік Қарымсақов. Одан бері де бірнеше жыл өтті. Бұл жылдар текке кеткен жоқ. Қазақстандық кәсіпкер индонезиялық кәсіпкерлердің біздің елдегі ең сенімді серіктесіне айналды. Ол осы жақында ғана Индонезия президенті Джоко Видороның бұйрығымен Индонезияның Алматыдағы құрметті консулы болып қайта тағайындалды. Осының өзі Қарымсақов жайлы көп жайды аңғартса керек. Қазақстандық кәсіпкерге сенім жүгі салмақтана түскен.ТУҒАН ЖЕРГЕ ТУЫҢДЫ ТІК
Серік №140 мектепті жақсы аяқтаған соң, Жамбыл гидромелиорация институтының Қызылорда филиалына оқуға түседі. Білім ордасын жақсы бітіреді. Инженер-механик мамандығын алып шықты. Бірақ бар ойы Алматыға ауды да тұрды. Неге екенін кім білсін, әйтеуір бизнестің қыз-қыз қайнаған ортасы осы қалада болып жатқандай көрінетін. Шынында да солай еді. Ата-анасын да, бауырларын да Алматыға қоныс аударуға көндірді-ау. Әкесі Алматы қалалық прокуратурасының баспасөз хатшысы болып ұзақ жыл табысты еңбек етті. Журналистикадан да қол үзген жоқ. Екі тілде шығатын «Прокуратура жаршысы»газетін ашты. Кейін оның атауы «Тура жол» болып өзгерді. 2014 жылы республикалық «Құқықтық Қазақстан» газеті Бас редакторының орынбасары қызметіне тағайындалды. Қазақстан Жазушылар және Журналистер одақтарының мүшелігіне өтті. Бірнеше кітаптың авторы атанды. Қазір Итен Қарымсақұлы құрметті еңбек демалысында. Серіктің анасы Күләйхан да Алматыға қоныс аударғаннан кейін өзінің сүйікті мамандығы – дәрігерлік еңбек жолын жалғастырды. Інілері Бақыт, Сабыржан, қарындасы Сәуле Алматыда бизнеске араласты. Бәріне ұйытқы болып жүрген – Серік. Тоқсаныншы жылдары Жоғарғы Кеңес (қазіргі Парламент) Алматыда еді. Серік Сенаттың аппаратында қызмет істеді. Бірақ қалауы кәсіпкерлік болғандықтан, біраз жылдан соң өзінің сүйікті ісіне қайта оралды. Алматыға қоныс аударғанмен, туған жермен байланыс үзілген жоқ. Жол түсіп, мүмкіндік болып жатса, білім берген мектебіне ат басын бұратыны бар. Қолдан келер көмегін жасайды. Бір барғанда мектеп оқушыларының спортқа бейімділігін байқайды. Бірақ бәрінің жаппай спортпен айналысуына білім ордасында мүмкіндік жоқ екеніне көзі жетеді. Спорт алаңы, құрал-жабдық, керек-жарақ тозған. Оны сатып алуға мектептің жағдайы жоқ. Он миллион теңгеге керекті спорттық жабдықтарды алып беріп, спорт алаңын жөндеуден өткізуге қолғабыс жасайды. Өзі оқыған сынып бөлмесін жабдықтауға көмектеседі. Осындай сауапты іске ұйытқы болған жас – кәсіпкер Серік Қарымсақов.Ғалым Омар - Хан
Астана