Алдағы оқу жылы аяқталысымен Жетісу облысында 22 бастауыш мектеп жабылады. Жергілікті әкімдік мұндай қадамға білім сапасын жақсарту және оңтайландыру мақсатында барып отыр, деп хабарлады turkystan.kz.
Qazaqstan арнасының мәліметінше, білім шаңырақтары жабылатын ауыл тұрғындары мұндай шешіммен келіспейді. Ауылдағы ағайын мектеп жабылса ауыл да құрдымға кетеді деген пікірде.
Ескелді ауданына қарасты Жендік елді мекенінде 150 адам тұрады. Ал бастауыш мектепте небәрі 8 оқушы ғана оқиды. Мектеп жабылады деген хабарды естіген халықтан маза кетті. Тұрғындар ең алдымен балаларының жағдайына алаңдайды. Себебі оқушылар білімін жалғастыру үшін бес шақырым жердегі Жетісу ауылына қатынап, оқуы тиіс.
«Автобус сағат жетіде келеді. Жетіде қыстың күні қараңғы. Балалар біріншіден ұйқысынан қағылады. Мектепке барғаннан кейін ұйықтап отырады партада. Қайтатын кезде сағат екіде шығады. Келем дегенше екі жарым болады», - деді Жендік ауылының тұрғыны Сермағанбет Жұбанов.
Шенділер ауылда жиналыс өткізіп, хаттама толтырамыз деп таза қағазға тұрғындардың қолын жинап алған. Бірақ хаттамаға не жазылғанынан ата-аналар бейхабар. Мектептің жабылуына әуелден қарсы болғандар енді қарсы емеспіз деп келісім бергендей болып қалдық па деп алаңдаулы.
«Таза бланкқа қол қойғызды. Содан кейін мен өзім наразылық білдірдім. «Кейін біз толтырамыз жібереміз» деді. Сол бізді алдағаны ма? 17 адам қарсы шықтық», - деді Жендік ауылының тұрғыны Қалима Тұрысбекова.
Жендіктегі мектепте спорт зал, мәжіліс зал, асхана деген мүлдем жоқ. Білім бөліміндегілер ең алдымен оқушыға қолайлы жағдай жасалады деп сендіріп отыр. Сондай-ақ оқушы тасымалына қосымша көлік бөлінетін болады. Ескелді ауданында Жендіктен бөлек тағы үш білім шаңырағы қысқарады. Ал облыс бойынша 22 бастауыш мектеп жабылады.
«Сапалы білім беру үшін, толық ыстық тамақпен қамтамасыз ету үшін, сыныптан тыс, мектептен тыс шараларды өз деңгейінде ұйымдастыру үшін негізгі орта білім беру ұйымдарына ауысып отыр», - деді Жетісу облыстық білім басқармасының басшысы Марат Сүлейменов.
Бастауыш мектептерде сабақ беретін 81 мұғалімге де жұмыс табылады. Ал білім шаңырақтары бала саны артып, мектепті қайта ашу қажеттілігі туындағанға дейін жергілікті әкімдіктің балансына беріледі.