Азаматтық авиация комитеті Малайзияның авиациялық билігімен бірлесіп, Air Asia X әуе компаниясының Қазақстанға тұрақты жолаушылар рейстерін ашу мәселесін пысықтады, деп хабарлады turkystan.kz.
2024 жылдың 1 ақпанынан бастап малайзиялық әуе компания А-330 типті әуе кемелерінде аптасына 4 рейс жиілігімен Куала-Лумпур-Алматы бағыты бойынша тікелей тұрақты жолаушылар рейстерін орындауды бастауды жоспарлап отыр. Рейстер сейсенбі, бейсенбі, сенбі және жексенбі күндері жүзеге асырылатын болады.
Қазақстан мен Малайзия арасында әуе қатынасының ашылуы екі ел арасындағы сауда-экономикалық, іскерлік, инвестициялық, туристік және мәдени ынтымақтастықты одан әрі дамытуға ықпал етеді деп күтілуде.
Айта кетерлігі, Air Asia X әуе компаниясы Air Asia Aviation Group компаниясының құрамына кіреді.
«Компания паркі 270-тен астам A-320, A-320neo, А-321neo және A-330 типті әуе кемелерінен тұрады. Осы компанияның франшизасымен әлемнің 25 еліне (Австралия, Оңтүстік Корея, Үндістан, Қытай, Индонезия, Жапония, Таиланд, Тайвань, Сингапур, АҚШ, Сауд Арабиясы, Вьетнам) 400-ден астам бағыт бойынша рейстер орындалады», - делінген хабарламада.