26 Aqpan 2020, 18:50 471 0 Jahan Túrkistan Gazeti

AQSh-tyń ishki sharýasyna Reseı aralasa ala ma?

AQSh Barlaý qyzmeti Reseı Federaııasy bıylǵy jyldyń qarasha aıynda ótetin prezıdenttik saılaýǵa aralasýǵa bel býyp otyrǵanyn málimdedi.

Barlaý qyzmetiniń bul málimetine qulaq asqan AQSh kongresiniń ókilder palatasy Reseı memleketi AQSh prezıdenti Donald Trampty jeńiske jetkizý maqsatynda alda ótetin prezıdenttik saılaýǵa aralasýy múmkin dep boljam jasaýda.

Mundaı tujyrymdy jabyq túrde ótkizilgen brıfıngte jarııa etkenine narazylyq týdyrǵan prezıdent Donald Tramp bul boljamdy joqqa shyǵardy. Ol muny ózine qarsy jasalǵan partızandyq shabýyl dep baǵalap, Twitter paraqshasynda: «Kongrestegi demokrattar kezekti jalǵan aqparat taratyp otyr. Bul Reseıdiń túk istemeıtin, eki apta ótse de Aıovadaǵy daýysyn esepteı almaı otyrǵan áldebir demokrat kandıdattardan meni joǵary qoıatynyn bildiredi» dep óz oıyn ortaǵa saldy. Tramp bul jazbamen tynyshtalyp qalmaı, bir jyl buryn ózi qyzmetke taǵaıyndaǵan Ulttyq barlaý qyzmeti basshysynyń mindetin atqarýshy Djozef Magýaırǵa sógis jarııalady. Budan bólek, barlaý qyzmetiniń mamandary Reseı Tramptyń saılaý kezindegi basty qarsylasy, Vermont shtatynyń senatory Bernı Sanderske de búıregi buryp, kómektesýge tyrysyp baǵatynyn málimdedi. Qarsylasy bolsa da, muny da nazardan tys qaldyrmaǵan Tramp Sanders pen Reseıdiń baılanysy joq ekenin basa aıtyp, munyń artynda demokrattar turǵanyn, olardyń demokratııany «ýlaǵysy» keletinin jáne saılaý naýqany kezinde jalǵan aqparat taratýǵa baryn salatynyn málimdedi.

Álııa TILEÝJANQYZY

Sońǵy jańalyqtar