14 Aqpan, 20:17 2288 0 Jańalyqtar Anar LEPESOVA

15 jyl boıy Qazaqstanda quldyqta bolǵan sheteldik óz elinde óliler sanatyna qosylǵan

Qaraǵandyda 15 jyl quldyqta bolǵan Salavat esimdi Reseı azamaty óziniń tiri ekenin dáleldep shyqty. Qojaıyny qaıtys bolǵan soń ǵana bostandyq alǵan azamat óz elinde óliler sanatyna qosylǵan, dep habarlaıdy "Astana" telearnasy. 

Salavat áskerde boryshyn ótegen soń Qazaqstanǵa kelipti.

Osynda júrip, qujattaryn joǵaltyp alǵan. Sol kezde tanysy oǵan óziniń ata-anasynyń qolynda jumys isteýdi usynǵan. Er adam bul usynysqa kelisken, alaıda, 15 jyl boıy quldyqta ómir súretini oıyna da kirmese kerek.

Uzaq jyldar boıy ol tamaq pen baspana úshin mal baǵyp, úı sharýasyn atqaryp kelgen. Tek qojaıyny qaıtys bolǵan soń ǵana bostandyqqa shyǵýyna múmkindik paıda bolypty. Salavat otanyna oralýǵa nıettengen, alaıda, ol jaqta er adamdy baıaǵyda óliler qataryna qosyp qoıǵany belgili boldy.

"Kelmeı aq qoısańyz bolady, siz óliler qataryndasyz dedi. Qaıtys bolǵanym týraly anyqtama da bar eken. Ony elshilikten berdi. 2003 jyly meni Reseıde jerlep qoıypty", – deıdi Salavat.

Er adam aqyry sot arqyly óziniń tiri ekenin dáleldegen. Alaıda, áli de qujattaryn qalpyna keltire almaı júr. Ol búginde úısizderge arnalǵan baspanada turyp, ár jerde paıda taýyp kúnin keshýde.

Elimizde taǵdyry osyǵan uqsaıtyn adamdardyń qarasy kóp ekeni belgili boldy. Ótken jyldyń ózinde 76 azamat adam saýdasynyń qurbany bolǵan. Olardyń basym bóligi – er adamdar. Sondaı-aq bir balanyń da saýdaǵa salynǵany anyqtaldy. Ádette olardy Qazaqstan aýmaǵynda satqan. 2019 jyly adamdy shetelge satýdyń bir ǵana oqıǵasy tirkelgen eken.

"Bir adam Túrkııaǵa satylǵan. Qalǵan jaǵdaılarda adamdar Qazaqstan aýmaǵynda paıdalanylǵan. Olardyń jıyrmasy – Qazaqstan azamaty. Bulardy bir qalalardan alyp ketip, baqsa qalada satqan. Iaǵnı, ishki adam saýdasy. Al adamdardy shetelden el aýmaǵyna alyp kirýdiń 50 oqıǵasy anyqtalǵan", – deıdi BUU-nyń mıgraııa boıynsha halyqaralyq uıymynyń ulttyq ofıeri Alııa Belonosova.

BUU ókiliniń aıtýynsha, ádette Ózbekstan, Reseı, Moldova, Fılıppın jáne Qytaı azamattary saýdaǵa salynady. Olardy negizinen úı sharýashylyǵynda, qurylysta, fermalarda jáne seks-ındýstrııada paıdalanady.

Sońǵy jańalyqtar