17 Qańtar, 17:50 4178 0 Óner Anar LEPESOVA

"Ánshilerdiń sharýasyna aralaspańyz!": Meırambek Besbaev Zaǵıpa Balıevanyń qıturqylyǵyn jaıyp saldy

Kúni keshe Qazaqstan oryndaýshylar odaǵynyń basqarma tóraǵasy bolyp saılanǵan Meırambek Besbaev Instagram paraqshasynda Zaǵıpa Balıevaǵa hat joldap, ánshilerdiń qarjysyna qol suǵýdy doǵarýdy talap etti.

Meırambek Besbaevtyń jazýynsha, odaqtyń burynǵy basshylyǵy jańa basshylyqqa qoqań-loqqy jasap, ártúrli jaǵymsyz áreketter arqyly qarsylyq kórsetýde. Besbaev burynǵy basshylyqtyń artynda Zaǵıpa Balıeva men onyń uly turǵanyn aıtty.

"Daýys berýge uıymnyń eń joǵarǵy basqarý organy — quryltaıshylardyń jalpy jıyny jasaqtaǵan basqarma músheleriniń barlyǵy qatysty. Saılaý ótkizýge qajetti kvorým boldy. Barlyq reglament pen zańdylyq tolyqtaı saqtaldy. Hattama toltyrylyp, meni bas dırektor qyzmetine kirisýim týraly buıryq ta shyǵyp qoıdy. Endi kelip, burynǵy basshylyq jańa basshylyqqa qarsy qoqań-loqqy kórsetip, ártúrli jaǵymsyz áreketter arqyly qarsylyq kórsetýde. Burynǵy basshylyqtyń artynda Sizdiń ulyńyz jáne ózińiz tur ekensiz", - dep jazdy odaqtyń jańa tóraǵasy.

Sondaı-aq, ol ánshilerge tıesili qarjyǵa jaǵalaspaýyn ótindi.

"Siz zańdy túrde saılanǵan maǵan, basqarma múshelerine qysym kórsetip, ártúrli memlekettik jáne quqyq qorǵaý organdaryna telefon shalyp jatyr ekensiz. Munyńyz múlde durys emes dep bilemiz! Nege siz ánshilerdiń sharýasyna aralasyp, alashapqyn bop jatyrsyz?! Biz sony túsinbeı otyrmyz. Bul áreket-qylyǵyńyz sizdeı úlken memleket qaıratkerine jaraspaıtyn sharýa. Ánshilerge tıesili aqshaǵa tek sizdiń balańyz ıelik etý kerek degen oı sizge qaıdan kelgen?! Biz óz sharýamyzdy ózimiz sheshýimiz kerek, ózimizge tıesili qarajatty ózimiz tıisinshe jumsaýymyz qajet. Eńbekten túsken qarajat bir qaltaǵa, naqtyraq aıtqanda sizdiń balańyzǵa emes, myń qaltaǵa ıaǵnı mańdaı terimen taýyp júrgen ánshiler men án óndeýshilerdiń qaltasyna túsý kerek. Sizden osyndaı áreketterińizdi toqtatýdy talap etemiz!", - dep jazdy M.Besbaev.

Sońǵy jańalyqtar