12 Jeltoqsan, 13:00 503 0 Aımaq Anar LEPESOVA

Pedofıldi áshkerelegen psıholog

Almaty oblysynyń ákimi Amandyq Batalov jasóspirimderge zorlyq kórsetý faktisin anyqtap, kináliniń jazaǵa tartylýyna muryndyq bolǵan, eń bastysy jábir kórgen jasóspirimge der kezinde psıhologııalyq kómek kórsetip, jarqyn ómirge bet burǵyzǵan Mataı orta mektebiniń psıhology Ajar Dúısenbekovany qabyldady, dep habarlaıdy  oblys ákiminiń baspasóz qyzmeti. 

Oblys ákimi Ajar Dúısenbekova jaıly bloger Janna Ahmetovanyń Facebook paraqshasynan bilgenin aıtty. Oqıǵadan beri biraz ýaqyt ótkenimen, bul psıhologty kásibıligi úshin marapattaýǵa kedergi emes ekenin de jetkizdi.

«Búgingi kúni árbir pedagog, árbir psıholog osylaı jumys isteýi kerek. Balalar sýııdiniń aldyn alyp, qıyn jaǵdaıda olarǵa kásibı maman retinde kómektese bildiń. Qazirgi kezde sýııd nege ósip ketti? Qıyn jaǵdaıǵa tap bolǵanda jasóspirimder tuıyqqa tirelip, jarqyn ómirge shyǵatyn jol tappaı qalady. Aınalasynda adam tolyp júrse de, problemasymen jalǵyz ózi betpe-bet keledi. Sondaı kezderde balanyń kóńil kúıin baıqap, áńgimelesip, tyǵyryqtan shyǵatyn jol kórsetý – otbasynda árqaısymyzdyń mindetimiz, al mektepte muǵalimniń jaýapkershiliginde. Sol jaýapkershilikti úlken abyroımen atqardyń. Seniń osy kásibı biliktiligiń barlyq pedagogtarǵa úlgi bolýy kerek», - dep rızashylyǵyn bildirgen oblys ákimi A. Batalov Ajar Dúısenbekovaǵa Qurmet gramotasyn usynyp, noýtbýk syıǵa tartty.

Ajar da óz kezeginde oblys basshysyna alǵysyn bildirdi. «Meniń ornymda bolsa, kez kelgen psıholog osylaı jasaıdy dep oılaımyn. Men bir erekshe is jasadym demeımin, tek ózimniń kásibı mindetimdi oryndadym. Árbir bala meıirim men mahabbatqa bólenip ósýi kerek, balaǵa zorlyq jasaýǵa eshkimniń de haqy joq. Sondyqtan biz árbir balanyń taǵdyryna jaýaptymyz. Meni elep-eskerip shaqyrǵanyńyzǵa, marapattap jatqanyńyzǵa shyn júrekten alǵys aıtamyn», - dedi A. Dúısenbekova.

Atap ótsek, Ajar Dúısenbekova 11 jyldan beri Mataı orta mektebinde psıholog bolyp jumys isteıdi. Otbasynda úsh ul tárbıelep otyrǵan baqytty ana. 2018 jyly eki birdeı jasóspirim qyzdyń taǵdyryna arasha túsip, jábir kórsetýshiniń zańǵa sáıkes jazasyn alýyna, al qyzdardyń jańa ómir bastaýyna maman retinde atsalysqan.

 

Sońǵy jańalyqtar