12 Jeltoqsan 2019, 17:26 898 0 Áleýmet Ásel ÁNÝARBEK

Jastar – ult bolashaǵy, memleket mártebesi

Memleket basshysy Qasym-Jomart Toqaev Jastar jylynyń jabylýy jáne Vo­lonter jylynyń ashylý rási­mine qa­tys­ty. Saltanatty shara barysynda Prezıdent Elbasynyń bastamasymen ótken Jastar jylynda atqarylǵan ju­mystardy qorytyndylap, keler jyldyń mańyzdy jobalarymen tanystyrdy.

Elimizdiń túkpir-túkpirinen kelgen 500-ge jýyq jastyń basyn qosqan jıynnyń Táýel­siz­dik kúnimen tuspa-tus kelgenin tilge tıek etken Memleket basshysy el mereıin asyrý jastardyń qolynda ekenin atap ótti. «Biz úshin budan asqan qasterli ári mańyzdy mereke joq. Táýel­siz­digimizdi nyǵaıtyp, elimizdi odan ary órkendetý – qazirgi urpaqtyń qasıetti boryshy. Sondyqtan biz sizderge zor úmit artamyz. Memleketimizdiń keleshegi – ózderińiz! Búgingi jastar – elimizdiń erteńi, ultymyzdyń bolashaǵy, memleketimizdiń mártebesi. Urpaǵyn aıalaı bilgen halyq irgeli jurtqa aınalatyny belgili. Biz halqymyzdy álemge tanytqan eń asyl qasıetterdi sizderdiń boılaryńyzdan kórgimiz keledi», – dedi Qasym-Jomart Toqaev.

Prezıdenttiń aıtýynsha, bıyl 5 myń azamat memleketten grant alyp, jas kásipker atanǵan. Aldaǵy 3 jyl ishinde olardyń sany 30 myńǵa kó­beımek. Sondaı-aq Memleket basshysy jumys­shy jastardy qoldaý jumystarynyń jalǵasa beretinin eskertip, elimizdiń iri qalalarynda jumys isteıtin jastarǵa 9 myń páter berý týraly sheshim qabyldaǵanyn jetkizdi. Páterdi jalǵa alý quny aıyna 15 myń teńge bolady.

Memleket basshysy óz sózinde jastardy qoldaý jóninde biryńǵaı keshendi baǵdarlama jasaý qajettine toqtaldy. «Biryńǵaı baǵdar­lama óskeleń urpaqtyń ózekti problemalaryn sheshýge baǵyttalady. Eń bastysy, onyń mehanızmi jastarymyz úshin qarapaıym ári túsinikti bolýy tıis. Jeke jáne kásibı turǵydan ósý, jumysqa ornalasý nemese turǵyn úı alý úshin Qazaqstannyń qaı jerinde qandaı múmkindikter bar ekenin árkim bilýge tıis», – dep atap ótti Q.Toqaev.

Sonymen qatar Prezıdent otbasy ınstıtýtyna basa mán berilmeı otyrǵanyna da nazar aýdardy. «Jastar saıasaty týraly aıtqanda otbasy ınstıtýtyn umytpaýymyz kerek. Bul – dástúrdi, ulttyq qundylyqtardy jáne urpaqtar sabaqtastyǵyn saqtaý úshin óte mańyzdy. Ókinishke qaraı, qazirgi tańda ajyrasý faktileri osy saladaǵy túıtkildi máseleniń birine aınaldy», – dedi Qasym-Jomart Toqaev. Memleket basshysynyń aıtýynsha, otbasy qundylyqtaryn dáripteýdiń memleket úshin mańyzy zor.

– Halqymyzda «Otan – otbasynan bas­talady» degen qanatty sóz bar. Árbir otbasyn saqtaý – Otanymyzdyń berik bolýy­nyń kepili. Jas shańyraq baqyt besigine aı­nalýǵa tıis. Olardyń árqaısysyna tu­tastyq pen tatýlyqtyń dástúrin ornyq­tyrýymyz kerek. Zııaly qaýym ókilderi men ustazdar jastar arasynda túsindirý ju­mys­taryn júrgizip, otbasy qundylyq­ta­ryn dáripteýi qajet», – dedi Prezıdent.

Qasym-Jomart Kemeluly atap aıtqan mańyzdy máseleniń biri – bilim berý sapasy. Memleket basshysy dıplom basyp shy­ǵaratyn jáne taratatyn  mekemege aı­nal­ǵan joǵary oqý oryndaryna qatysty shara qabyldaý qajettigin talap etti. Sonymen qatar Prezıdent Úkimetke joǵary oqý  oryndary men kolledj stýdentteriniń shákirtaqysyn kóterý týraly tapsyrma júktedi.

– Joǵary oqý oryndary stýdentteriniń stı­pendııasyn arttyrý ózekti máse­le­lerdiń biri ekenin bilemin. Bul máselege kóńil bólinbeı qaldy. 2016  jyldan beri stıpendııa kóbeıgen joq. Sondyqtan stýdentterdi qoldaý úshin  2020 jyldyń 1 qańtarynan bastap bakalavrıat, magıs­tratýra men  doktorantýrada oqıtyn stýdentterdiń stıpendııasyn 25 paıyzǵa ósirý jóninde sheshim qabyldadym. Bul jal­py 130 myńǵa jýyq adamdy qamtıdy. Mundaı qoldaý kolledj stýdentterine de kórsetiletin bolady, – dedi Memleket basshysy.

Qasym-Jomart Toqaev aldaǵy Volonter jylynyń mindetteri týraly aıta ke­lip,  birneshe negizgi baǵyttarǵa nazar aý­darýdy usyndy. Prezıdent volonterlikti ulttyq masshtabta ǵana emes, árbir qala men aýylda damytý kerek dep sanaıtynyn aıtty. Sonymen qatar ujymdyq volonter­likti  órkendetýge memlekettik apparatty da, ulttyq jáne iri kompanııalardy da at­salysýǵa shaqyrdy.

– Dana halqymyz «Jumyla kótergen júk jeńil» degen. Qaıyrymdylyq pen meıi­rimdilik – qanymyzǵa sińgen qasıet. Qa­zaqta asar  jasap, bir-birine kómektesip, qol­daý kórsetý dástúri bar. Onyń vo­lonter­likpen úndesetini sózsiz. Son­dyqtan aldaǵy jyly sol dástúrdi zamanǵa saı qaıta jańǵyrtýymyz qajet, – dedi Memleket basshysy.

Qazaqstan Prezıdenti óz sózinde volonterlik qyzmetti eńbek ótiline qosýdy usyndy. «Volonterlik saǵattardy eńbek ótiline qosý ádistemesin engizý mańyzdy. Ási­rese, bul osy salada turaqty isteıtin­der­ge qatysty. Meniń oıymsha, bul, mańyzdy másele», – dedi Memleket basshysy. Sonymen qatar Memleket basshysy úki­metke volonter stýdentterdiń shákirta­qysyn kóbeıtý máselesin sheshýdi tapsyrdy. Al kommerııalyq baǵytta oqıtyndar úshin áleýmettik stýdenttik kredıt júıesin engizý usynyldy.

Shara sońynda Qasym-Jomart Toqaev bel­sendi jastardy memlekettik nagra­da­lar­men jáne alǵyshattarmen marapattady.

Sońǵy jańalyqtar