9 Jeltoqsan, 19:10 387 0 Jańalyqtar Anar LEPESOVA

Almatyda jazýshylarǵa qoldaý artady

Almaty ákimdigi qaladaǵy aqyn-jazýshylardyń kitaptarynyń jaryq kórýine qoldaý kórsetpek. Bul týraly  Qazaqstan Jazýshylar odaǵynyń qurylýyna jáne «Qazaq ádebıeti» gazetiniń ashylýyna 85 jyl tolýyna oraı ótken jıynda qala ákimi Baqytjan Saǵyntaev málimdedi.

«Jazýshylar odaǵynyń qatparly tarıhy Almatymen tustasyp keledi. 85 jyl buryn boı kótergen odaqtyń birneshe býyny Almatyda qalyptasyp, osynda tabysty eńbek etti. Súıikti qalamyz týraly qalam terbemegen jazýshy, tolǵanbaǵan aqyn joq dese bolady. Qazir Almatyda Jazýshylar odaǵynyń 360 múshesi turady. Sol qalamgerlermen keń kólemde de, jeke de birneshe márte júzdesip pikir almastyq», - dedi  Baqytjan Saǵyntaev.

Qala ákimdigi belgili shyǵarmashylyq ókilderiniń keshterin, kórmelerin, mereıtoılaryn uıymdastyrýdan bólek, qalamgerlerge grant taǵaıyndaýdy da dástúrge aınaldyrmaq.

«Múmkindigine qaraı kitaptardy da shyǵaryp jatyrmyz. Bıyl zııaly qaýym ókilderimen jumys jasaýdyń jańa júıesin engizdik. Odaqtyń tikeleı usynysy boıynsha 150 grant taǵaıyndaldy. 90 grant óz ıelerine jetse, qalǵan 60 jyl sońyna deıin tabystalady. Aldaǵy jyldary iriktelgen 20-ǵa jýyq aqyn-jazýshylardyń kitaptarynyń jaryq kórýine qoldaý kórsetemiz. Bul baǵyttaǵy jumystar óz kezeginde aqyn jazýshy, dramatýrg, synshylardyń qalamyzdyń, tutastaı elimizdiń tynys tirshiligin sýretteıtin ádebı shyǵarmalar jazýyna septigin tıgizedi dep oılaımyz. El rýhanııatynyń ortalyǵy sanalatyn qalamyzdyń órkenıet jolynda ózderińizben aıanbaı eńbek etip, mádenıetimiz ben ádebıetimizdi damytý barlyǵymyzdyń ortaq mindetimiz dep esepteımin», - dedi shahar basshysy.

 

 

Sońǵy jańalyqtar