8 Jeltoqsan, 11:35 387 0 Aımaq Anar LEPESOVA

Qazaqstandaǵy halyq sany eń kóp aýyl jaıly ne bilemiz?

Qazaqstandaǵy halyq sany eń kóp aýyl – Mańǵystaý oblysyndaǵy Beıneý aýyly. Bul týraly Ulttyq ekonomıka mınıstrligi Statıstıka komıteti habarlady. 

Komıtettiń dereginshe, 2019 jyldyń 1 sáýirine osy aýyldyń halyq sany 53 286 adam quraǵan.

Tarıhqa kóz júgirtsek, Beıneý aýylynyń irgetasy 1916 jyly qalanyp, 1948-1963 jyldar aralyǵynda Beıneý óńirin ıgerýdiń birinshi kezeńi aıaqtalǵan. Ekinshi kezeń 1963 jyly Maqat-Mańǵystaý, Beıneý-Qońyrat temirjoldarynyń salynyp, paıdalanýǵa berilýinen bastaý alady. Burynǵy "Jibek joly" toraby qaıtadan el men eldi jalǵastyratyn, aralastyratyn kúretamyrǵa aınalyp, Beıneý stanııasynyń baǵy janyp, toǵyz joldyń toraby, Orta Azııaǵa shyǵatyn Qazaqstannyń qaqpasy atanǵan. Ortalyq Azııa gaz qubyry jelisi tartylyp, kompressor stanııasynyń ornalasýy, Beıneý aýylynyń ósýine zor áserin tıgizgen. Gazshylar Beıneý men Boranqul aýyldaryn sándi ǵımarattarmen árleı tústi.

Aınalasy on jyldyń ishinde Beıneý temirjolshylardyń, gaz ben munaı tasymaldaýshylardyń, qurylysshylardyń kósheleri kók jelekke toly qala tıpti mekenine aınalǵan. 1969 jyly Sam óńirin óriske toltyrǵan mal fermalarynyń negizinde Mańǵystaý keńshary quryldy.

Búginde 53 myńnan astam turǵyny bar aýylda jalpy orta bilim beretin 11 mektep, on bóbekjaı, bir keshki mektep, bir óner mektebi, bir sport mektebi, jekpe-jek sport zaly, boks zaly, kásiptik bilim beretin eki kolledj, jeke qosymsha bilim beretin bes ortalyq, bir aýrýhana bar.

Beıneý aýyldyq ákimdiginiń málimetinshe, aýyldaǵy týý deńgeıi 2,38 paıyzǵa artqan, bıyl ómirge kelgen sábılerdiń sany - 1256 bala. Jergilikti turǵyndardyń aıtýynsha, beıneýlikterdiń sany Qazaqstan boıynsha eń joǵary bolýynyń syry  halyqtyń ómir súrý deńgeıine baılanysty. Aıtalyq, aýylda temirjol jáne avtomobıl jol qatynastary, sondaı-aq, baılanys júıesi, kommýnaldyq qyzmetter - gaz, sý, toq jumysy joǵary deńgeıde.

Sońǵy jańalyqtar