5 Jeltoqsan, 16:43 455 0 Mádenıet Túrkistan Gazeti

Qazaqshasy jatyq «Muzdy ólke – 2»

Jýyqta «Bolashaq» qaýymdastyǵynyń júzege asyrýymen Walt Disney Animation Studios usynǵan «Muzdy ólke – 2» tolyqmetrajdy anımaııalyq fılmi kórermenge jol tartty. Bul fılm – eki márte «Úzdik áýen», sosyn «Úzdik anı­ma­ııalyq fılm» sanattary boıynsha «Oskar» júldesin ıe­len­gen jáne eń tabysty kassalyq fılm sanalǵan kınotýyn­dy. «Bolashaq» qaýymdastyǵynyń «Ózińnen basta» jobasynyń bastamasymen aýdarylǵan kezekti 33-shi fılmniń sıýjeti erek.

Apaly-sińili Elza men Annanyń basynan ótken shym-shytyrman hıkaıa kimdi de bolsa elitip, ózine baýrap ala­dy. Tutas álemdi ózine telmirtken bul fılmniń túp ıdeıasy túrki halyqtarynyń nanym-seniminen, mıfologııasynan  alynǵany belgili. Endi, mine, sol ıdeıasy bizge tanys Krıss Bak pen Djennıfer Lıdiń rejısserligimen túsirilgen fılm ana tilimizde sóıledi.

Dýblıaj rejısseri jáne aqqala Olaftyń daýysyn dybystaǵan belgili akter Shahmurat Ordabaev: «Bul – óte qyzyqty joba. Kastıng bastalǵan sátten bastap prokatqa shyqqanǵa deıin árbir detalǵa erekshe mán berip, nazar aýdardyq. Fılmniń mátinin qazaqtyń tabıǵatyna saı erkin aýdaryp, dıalogtar arasyna Abaı atamyzdyń «Sur bult túsi sýyq qaptaıdy aspan», «Ǵashyqtyń tili – tilsiz til» degen­deı sııaqty óleń joldaryn qosyp, keıipkerlerdiń bolmysyn ashýǵa tyrystyq. Búkil álem balasynyń qııalyna qanat bitirgen fılm», – deıdi.  Elzany qazaqsha sóıletken – Begim­nur Qalıla, Annanyń daýysyn dybystaǵan Nazerke Serikbolqyzy sııaqty jas teatr jáne kıno aktrısalary. Kıno jobaǵa Danııar Ótegen, Dınara Sultan, Indı Edilbaeva jáne taǵy bas­qa oryndaýshylar qatysqan.

Jansaıa JANATQYZY, kórermen:

– Ke­remet mýltfılm! Otbasymmen baryp kórdim. Ana  tilimizde dybystalǵan týyndyda keıipkerler sózi maǵynasyna qaraı aýdarylǵan.  Mýzykalyq effektileri erekshe. Akterlerdiń daýysy da áserli. Qynjyltatyn jáıt, kınoteatrda qazaq tilindegi kórsetilim óte yńǵaısyz ýaqytqa  qoıylǵan. Kim demalys kúnderi tańǵy 9-da kınoteatrdan tabylsyn? Barlyǵy 100 adamǵa arnalǵan kórermen zalynda uzyn-yrǵasy 10-nan asa adam ǵa­na otyrdyq.  «Muzdy ólkeni» adam de­malys ornyna kóp baratyn, keshki serýen ýaqyty 18-19 saǵattarǵa qoısa, qatyp-aq keter edi! Estir qulaq bolsa, qazaq tildi kórermenniń nazy aıtyldy.

Eldos MÁDIEV, kórermen: 

– Bul mýltfılm maǵan erekshe unady. Ózimdi sol kınonyń keıipkeri sııaqty sezinip otyrdym. Bunyń 1-shi bólimin erekshe yqylaspen kórgen bolatynmyn. Mine, 2-shi bólimi de kóńilimnen shyqty. Qazaq tiline erkin aýdarylǵan. Keıipkerlerdiń mımıkasyna deıin qazaqsha sóılegenine qýanyp qaldym. Bizdiń ana tilimizdiń qoldanys aıasyn osyndaı álemdik jobalar kótergenine rızamyz. Osyndaı anımaııalyq fılmderdi ózimizdiń rejısserler de túsirse eken degen tilek bar. Qashanǵy sheteldiń túsirgen dúnıesin qyzyqtap, solarǵa ıek arta beremiz?

Aıǵanym ÓTEÝLI, kórermen:

– «Bolashaq» qory aýdarǵan mýltfılmderdi sońǵy jyldary otbasymyzben úzbeı kórip kelemiz. Ár premera saıyn shyǵarmashylyq ujymnyń tynymsyz izdenisi men eńbeginiń nátıjesi baıqalady. Máselen, «Arystan patshadaǵy» orystar Shram dep ataǵan jaǵymsyz keıipkerge «Yzǵar» degen atty taýyp qoısa, «Muzdy ólke-2» mýltfılminiń bir-eki epızodyna danyshpan Abaıdyń óleńderinen bir jol bolsa da úzindini oryndy qoldana bilgen. Árıne, balalarǵa arnalǵan týyndy bolǵandyqtan mýltfılmde qaısarlyq pen meıirimdilik, baýyrmaldyq aıqyn kórsetilgen. Ásirese, Anna men Elzanyń arasyndaǵy syılastyq apaly-sińililerdiń qandaı bolatynyn balalarǵa úıretedi. Mýltfılmde qıyn jaǵdaılar bolmasa, jaǵymsyz keıipkerler joq. Eń bastysy, Gollıvýdtyń qııal-ǵajaıyp ertegige qurylǵan týyndylarynyń qazaqsha sóılep qana qoımaı, kınoteatrlarda seans sany men kórermenniń artýy kóńil qýantady.

Eldos Núsipuly

 

 

Sońǵy jańalyqtar