5 Jeltoqsan, 10:26 473 0 Tehnologııalar Túrkistan Gazeti

Erekshe adamdarǵa arnalǵan múmkindik

Álemdik naryqta IT tehnologııa erekshe mańyzǵa ıe bolyp otyr. Bizdiń elimizdiń de strategııalyq baǵytyna aınalǵan «ıfrly Qazaqstan» jobasy iske qosyldy. Qazir aqparat salasyn meńgergen bilikti mamandarǵa degen suranys artty.

Nur-Sultan qalasynda IT tehnologııa salasyndaǵy bilimdi taratý  maqsatynda «Teńdeı IT múmkinshilikter álemi» degen atpen ITeachMe ınklıýzıvti jobasy ótti. Jobanyń maqsaty – IT salasynda daǵdysy qalyptasqan múmkindigi shekteýli jandardy oqytý arqyly jumysqa ornalastyrý.

Joba jetekshisi Zahıra Begalıeva suranysy erekshe jandardyń ómirge qyzyǵýshylyǵy myqty bolýy kerek dep sanaıdy. «Múmkindigi shekteýli jandarǵa máselemdi bireý kelip sheship beredi dep kútýdiń qajeti joq, kerisinshe múgedektigi joq jandarmen teń dárejede básekege qabiletti bolýǵa tyrysý kerek. Joba barysynda qatysýshylar óz ıdeıasyn ónimge aınaldyrýdyń joldaryn meńgeredi. Sonymen qatar óz kózqarasyn dáleldeýge, qıyndyqtan qoryqpaýǵa úırenedi. IT salasynda ózgeler sekildi teń quqyqty bola otyryp, barlyǵy bile bermeıtin tyń aqparattarmen qanyǵady, jumys berýshilermen tikeleı kezdese alady», – dep atap ótti joba jetekshisi Zahıra Begalıeva.

Elimiz boıynsha múmkindigi shekteýli jandar arasynda IT mamandary óte az. Alǵashynda uıymdastyrýshylar úshin barlyq aımaqtan talanttardy izdep tabý birshama qıyndyq týdyrǵan. Uıymdastyrýshylar osyǵan deıin  ITeachMe ınklıýzıvti jobasyn Petropavl, Aqtaý, Atyraý, Almaty qalalarynda ótkizgen. Atalǵan jobaǵa osyǵan deıin 18-35 jas aralyǵyndaǵy 500-den astam adamnan ótinish kelip túsken.

Búginde múmkindigi shekteýli jandarǵa arnalyp uıymdastyrylyp jatqan kýrs, trenıng, semınar  kóp. Kóbisi tek bilim berip qana qoıady, tájirıbede qoldanýdy úıretpeıdi. Al ITeachMe ınklıýzıvti jobasy qatysýshylarǵa bilim bere otyryp, sol sátte-aq tájirıbede qoldanýdyń, ıaǵnı ıdeıany daıyn ónim retinde ınvestorlarǵa usynýdyń tetikterin kórsetedi.

Jobanyń birinshi kezeńi qarasha aıynda aıaqtalady. Osyǵan deıingi hakatonda qarjylaı qoldaýǵa ıe bolǵan 7 úmitker bar. Solardyń biri –  ASAR mobıldi qosymshasyn qoldanysqa engizgen Almaty qalasynyń turǵyny Zaıtýna Hýsaınova. «Men – múmkindigi shekteýli jannyń birimin. Bir joly meniń qatty ystyǵym kóterilip, jatyp qaldym. Sol sátte janymda maǵan ornymnan turyp dári ishýge kómektesetin tiri jan bolmady. Sonymen qatar byltyr BAQ betterinde eki múgedek adam úıden shyǵa almaı, balkonǵa shyǵyp elden tamaq satyp alyp berýin surap aıǵaılaǵany týraly jazyldy. Keı jaǵdaılarda adamdar jalǵyz qalyp, shynynda da kómekke zárý bolady. Biz qoǵamdaǵy osy máseleniń sheshimin taptyq», – deıdi úmitker.

ASAR mobıldi qosymshasy arqyly eriktiler kimge qandaı kómek qajet ekenin kóre alady. Qosymshany múmkindigi shekteýli jandardan bólek kómektesetin eshkimi joq adamdar da qoldana alady. Sonymen qatar, atalǵan jobanyń Qazaqstanda balamasy joq ekenin de aıta ketýimiz kerek. Osylaısha qatysýshylar jańa tehnologııalar arqyly halyqtyń áleýmettik turǵydan osal toptarynyń ómirin jeńildetýge atsalysyp jatyr. Bul óz kezeginde qoǵamnyń múmkindigi shekteýli jandarǵa degen kózqarasyn ózgertip, tolerantty qarym-qatynas qurýǵa baǵyttaıdy.

«Jastar jyly» aıasynda qolǵa alynǵan joba búginde el aýmaǵynan bólek, shetelge tanyla bastady. Joba uıymdastyrýshylary Ózbekstan jáne Ázirbaıjan elinen tájirıbe almasýǵa usynys alyp úlgergen. Aldaǵy 2020 jyldyń qańtar aıynda úmitkerler baq synap, jeńimpaz anyqtalmaq. Joba qorytyndysy boıynsha jeńimpaz IT salasy boıynsha bilim alyp, óz jobasyn júzege asyrýǵa 1 mln teńge kóleminde qarjyǵa ıe
bolady.

Araılym JOLDASBEKQYZY

 

Sońǵy jańalyqtar