19 Qarasha, 10:43 278 0 Rýhanııat Anar LEPESOVA

Almatyda Máýlit merekesi atalyp ótti

Qazaqstan musylmandary dinı basqarmasynyń uıymdastyrýymen Almatydaǵy Respýblıka saraıynda adamzattyń asyly paıǵambarymyz Muhammedtiń (oǵan Allanyń salaýaty men sálemi bolsyn) týǵan aıyna arnalǵan "Áz  paıǵambar haq joly" atty merekelik Máýlit keshi ótti, dep habarlady QMDB-nyń baspasóz qyzmeti.

Máýlit keshi qarańǵylyqta qalǵan adamazatty jaryqqa shyǵarý úshin Alla Taǵala tarapynan Jebireıil (ǵ.s.) perishteniń Muhammed paıǵambarymyzǵa (oǵan Allanyń salaýaty men sálemi bolsyn) alǵashqy ýahıdy ákelýi týraly arnaıy ázirlengen beınebaıanmen bastaldy. Keıinnen Almaty Ortalyq meshitiniń azanshysy, qarı Serik Polathanulynyń «Alaq» súresiniń alǵashqy bes aıatyn oqýmen, aqyn, sazger Jáken Omarovtyń qazaqsha Máýlit jyryn aıtýmen jáne Qanatbek Polatbek, Serjanáli Álibek, Ergen Aıtymbetov, Raıym Ýaıystyń ásem ánimen jalǵasty.

Máýlit keshin QMDB-nyń tóraǵasy, bas múftı Serikbaı qajy Oraz Haziret saltanatty túrde sóz sóılep ashyp berdi. Bas múftı óz sózinde paıǵambarymyzdyń (oǵan Allanyń salaýaty men sálemi bolsyn) Máýlit aıymen Almaty jurtshylyǵyn quttyqtap, Alla elshisiniń dúnıege kelip, ǵalamdy nurǵa bóleýi – artyna ergen úmbeti úshin úlken qýanysh ekenin aıtty. Paıǵambarymyzdyń ǵıbratty ǵumyrynan syr shertip, musylmandardy onyń kórkem minezinen úlgi alýǵa shaqyrdy. Sondaı-aq Máýlit merekesin toılaýdyń artyqshylyǵy men paıǵambardy súıýdiń, onyń haq jolymen júrýdiń mańyzyna toqtaldy.

Al "Aq orda" respýblıkalyq qozǵalysynyń tóraǵa orynbasary Qanat Musaǵulov osy qozǵalystyń tóraǵasy Qaırat Satybaldyulynyń quttyqtaý sózin jetkizdi. Kórermen kózaıymyna aınalyp úlgergen, ádemi ázilderimen aqıqatty astarlap aıtyp júrgen "Óner qyrandary" ázil-syqaq teatry "Sahabalardyń paıǵambarǵa degen mahabbaty", "Paıǵambar mekenine saǵynysh" atty tárbıelik máni zor qoıylymdaryn el nazaryna usyndy. Maqsat Sabıtov "Keshir, ıá, Rasýlalla" atty áserli monologyn oryndasa, kesh sońy Ergen Aıtymbetov "Paıǵambarǵa salaýat" ánimen aıaqtaldy.

Esterińizge sala ketsek, aqyn Jáken Omarov ótken jyly oryndaǵan Máýlit jyrynda paıǵambarymyzdyń dúnıege kelýi men qyryq jasqa deıingi ómirin baıandaǵan edi. Al bıylǵy Máýlit jyry alǵashqy ýahıdyń kelýinen bastap paıǵambarymyzdyń Mekkedegi dindi jaıýy, sahabalardyń ıslam dinine kirýi, Mıǵraj sapary, sońynda múshrikterden japa shekken Alla elshisiniń Mádınaǵa qonys aýdarýymen aıaqtaldy. Alla buıyrsa, keler jylǵy Máýlitte paıǵambarymyzdyń Mádına qalasynda ótken ómiri jyrlanatyn bolady.

Bez nazvanııa (4).jpg

Almatyda atalyp ótken bıylǵy Máýlit merekesi 3 birdeı jańalyǵymen erekshelendi.

Birinshi – ótken jylǵy Máýlit merekesinde kesh ataýymen birdeı "Tálimger paıǵambar taǵylymy" atty kitap jaryq kórip, elge taratylǵan bolatyn. Sol sııaqty bıyl da Máýlit keshimen attas Paıǵambarymyzdyń haq jolyn úıretetin "Áz paıǵambar haq joly" atty jańa kitap shyǵarylyp, kesh qonaqtaryna úlestirildi. Bul úrdis aldaǵy Máýlitterde óz jalǵasyn tabady degen úmittemiz.

Ekinshi – Máýlit keshiniń 2-seansynda kórermender arasynda umra qajylyǵy oınatyldy. Kórermenderdiń arasyn eki adam, demeýshilerdiń kómegimen, "Hıkmet-Trevl" qajylyq kompanııasy arqyly umra qajylyǵyna baratyn boldy.

Bez nazvanııa (3).jpg

Úshinshi – Respýblıka saraıynyń foıesinde paıǵambarymyzdyń (oǵan Allanyń salaýaty men sálemi bolsyn) ómirinde paıdalanǵan zattarynyń foto-galereıasy, paıǵambarymyzdyń ata-tek shejiresi, Qasıetti qaǵbanyń, "Ibrahım maqamynyń", Safa men Marýanyń maketteri jáne I LOVE MUHAMMAD (Men paıǵambarymdy jaqsy kóremin) kórnekiligi qoıyldy. Sonymen qatar, qonaqtar paıǵambarymyzdyń kallıgrafııalyq (kórkem jazý) sheberlikpen jazylǵan esimderiniń kórmesin tamashalady.

Sońǵy jańalyqtar