18 Qarasha, 10:05 301 0 Ádebıet Anar LEPESOVA

Mysyrda zamanaýı qazaq ádebıeti antologııasynyń arab tilindegi nusqasy tanystyryldy

Kaırdegi Mysyr mádenıet isteri jónindegi joǵarǵy keńesinde oqyrman qaýymǵa qazirgi qazaq poezııasy men prozasy antologııasynyń arab tilindegi nusqasy tanystyryldy. 

«Qazaq ádebıeti jınaǵynyń arab tiline aýdarmasy men basylymyn kórkem aýdarma salasyndaǵy tájirıbeli mysyrlyq mamandardyń qatysýymen Mysyr mádenı isteri jónindegi ortalyǵy men «MedıaHab» baspa úıi oryndady. Antologııalar alǵysóziniń avtory – IýNESKO janyndaǵy ALECSO (Arab lıgasy memleketterindegi ǵylym, bilim jáne mádenıet isterin úılestirý uıymy) uıymynyń bas dırektory doktor Muhammed ýld Omar», - delingen taratylǵan málimette.

«MedıaHab» baspasynan jaryq kórgen qazaq prozasy men poezııasynyń jınaqtary Arab Lıgasyna múshe 22 memlekettiń 4 myńǵa jýyq kitaphanasy, ýnıversıtetteri men ǵylymı ortalyqtaryna jetkiziledi. Bul – shamamen 500 mıllıon oqyrman aýdıtorııasy.

Tanystyrylymǵa Mysyr Mádenıet isteri jónindegi Joǵary keńesiniń Bas hatshysy Hısham Azmı, ALECSO uıymynyń arab zertteýler ınstıtýtynyń dırektory Alı Hafııan qatysty. Qazaqstan tarapynan sharaǵa QR Prezıdentiniń kómekshisi Aıda Balaeva, QR Mysyr Arab Respýblıkasyndaǵy Tótenshe jáne ókiletti elshisi Arman Isaǵalıev, Qazaqstan Jazýshylar odaǵynyń tóraǵasy Ulyqbek Esdáýlet jáne Ulttyq aýdarma bıýrosynyń atqarýshy dırektory Raýan Kenjehanuly qatysty.

Eske salaıyq, zamanaýı qazaq ádebıetiniń úzdik úlgilerin BUU 6 tiline aýdarý jobasy «Jahandaǵy zamanaýı qazaqstandyq mádenıet» jobasy aıasynda júzege asyrylýda. Sondaı-aq Qazaqstan Respýblıkasynyń Tuńǵysh Prezıdenti – Elbasy N.Nazarbaevtyń bastamasymen qolǵa alynǵan «Rýhanı jańǵyrý» baǵdarlamasynyń mańyzdy baǵyty bolyp tabylady.

«Jahandaǵy zamanaýı qazaqstandyq mádenıet» jobasynyń mindeti – qazirgi zamanǵy Qazaqstannyń ádebıet, mýzyka, beıneleý óneri, horeografııa, kıno jáne teatr salalaryndaǵy mádenı qazynalaryn álem jurtshylyǵyna tanystyrý. «Arab álemi men bizdiń halqymyzdy ıslam dini ǵana emes, san myń jyldyq basqa da jan-jaqty qatynastar baılanystyrady. Qazaq jerinde dúnıege kelgen ál-Farabı men Sultan Beıbarystyń esimderi sizderge ejelden tanys. Búgin osy tarıhı tamyrlastyqty jańa beleske kóteretin múmkindik týýda. Sizder qazaq ádebıeti arqyly bizdiń halqymyzdy tereńirek tanı alasyzdar. Qazaqstannyń Tuńǵysh prezıdenti Nursultan Nazarbaev mádenıetimizdi jer júzine tanystyrý týraly jobany usynǵanda arab álemine de basa nazar aýdardy. Elbasynyń tapsyrmasymen, qazaq ádebıetiniń tańdaýly týyndylary Birikken Ulttar Uıymynyń 6 tiline aýdarylyp, jaryqqa shyqty», – dedi kitaptardy tanystyrý saltanatynda Aıda Balaeva.

«Jahandaǵy zamanaýı qazaqstandyq mádenıet» jobasy aıasynda qazirgi qazaq ádebıetiniń qos antologııasy aýdarylyp, jaryq kórdi. Olar – «Qazirgi qazaq prozasynyń antologııasy» jáne «Qazirgi qazaq poezııasynyń antologııasy». Ár antologııanyń kólemi – shamamen 500 betteı, árqaısysyna qazaqstandyq 30 avtordyń tańdamaly shyǵarmalary endi. Kitaptardyń aǵylshyn tilindegi aýdarmasy bıylǵy 25 qyrkúıek kúni Brıtanııada, ıspan tilindegi nusqasy 27 qyrkúıekte Ispanııada, orys tilindegi antologııa 15 qazanda Reseıde tanystyryldy.

 

Sońǵy jańalyqtar