16 Qarasha, 20:47 272 0 Rýhanııat Anar LEPESOVA

Sozaqta «Tańbaly tas» eskertkishi ashyldy

Túrkistan oblysy Sozaq aýdanynda «Tańbaly tas» tarıhı eskertkishiniń ashylý rásimi boldy. Betbaqdala tósindegi eskertkish «Appaq» jaýapkershiligi shekteýli seriktestiginiń demeýshiligimen qaıta jańǵyrtyldy, dep habarlaıdy QazAqparat.

Taǵylymy mol sharaǵa óskeleń urpaqqa Otan tarıhyn nasıhattaý maqsatyn kózdegen jas ustazdar men ólke tarıhyn tanýǵa qumar belsendi jastar arnaıy qatysty. Eskertkishtiń ashylý rásiminde Sozaq aýdanynyń ákimi Salyhan Polatov sóz alyp, «Tańbaly tastyń» qazaq tarıhynda alatyn orny aıyryqsha ekenine toqtaldy. «Túrki dúnıesi úshin Kúltegin, Tonykók, Bilge qaǵan jazýlary qandaı qundy bolsa, qazaq úshin Tańbaly tas ta sondaı qundy. «Rýhanı jańǵyrý» baǵdarlamasy aıasynda qaıta jańǵyrtý jumystaryn júrgizgen seriktestiktiń Bas dırektory Aleksandr Avdeev pen ujymǵa alǵys aıtamyn»,- dedi aýdan ákimi.

Sharada sondaı-aq, Sozaq aýdanynyń Qurmetti azamaty Sozaqbaı Ábdiqulov, «QazAtomProm» UAK óndiris jónindegi Bas dırektory Dáýren Qunanbaev, «Appaq» JShS Bas dırektory Aleksandr Avdeev, Sozaq aýdanynyń Ardagerler keńesiniń tóraǵasy Qabylbek Espenbetov Qazaq tarıhynyń shoqtyǵy bıik eskertkishi «Tańbaly tas» jaıynda, onyń qundylyǵy jóninde sóz qozǵady.

Tarıhshy Súleımen Tábirizuly tarıhtyń túpqazyǵy «Tańbaly tas» týraly ǵalymdardyń derekterin keltire otyryp keńinen áńgimelep berdi. «Qazaq halqy ǵasyrlar boıy tarıhı damý barysynda kóptegen ádet-ǵurpy, tili, dini bir týystas rý-taıpalardan quralyp, halyq bolǵandyǵy baıqalady. Qasıetti «Tańbaly tas» - babalarymyzdyń san ǵasyrlyq ultty qalyptastyrý jolyndaǵy qajymaı-talmaı kúresken erlik isiniń jemisi», - dedi Súleımen Tábirizuly.

Aıta keteıik, «Tańbaly tas» tarıhı eskertkishi 2008 jyly IýNESKO-nyń Dúnıejúzilik mádenı mura tizimine, 2017 jyly Qazaqstannyń kıeli jerleriniń geografııasyna engen tarıhı qundy jádiger sanalady.

 

Sońǵy jańalyqtar