15 Qarasha, 10:59 319 0 Sport Anar LEPESOVA

Amerıkalyq jýrnalıstiń málimdemesi Golovkınniń jankúıerlerin alańdatyp qoıdy

FightNights.com saıtynyń jýrnalısi Raıan O’Hara orta salmaqtaǵy IBF tujyrymy boıynsha álem chempıony Gennadıı Golovkınniń densaýlyǵyna alańdaýshylyq bildirdi, dep habarlady Sports.kz.

Amerıkalyq jýrnalıstiń pikirinshe, Golovkınniń jasy kelip qalǵandyqtan, bıiktiktegi jattyǵý onyń fızıkalyq jaǵdaıyna keri áserin tıgizýi múmkin.

Bıyl qazaqstandyq sportshy Abel Sanchespen kelisimshartyn buzyp, Djonaton Benkspen jattyǵa bastady. Alaıda ol jattyǵý ornyn ózgertpeı, burynǵydaı Kalıfornııa shtatyndaǵy Bıg Bear zalynda daıyndalyp júr.

37 jastaǵy Golovkın úshin jas shamasy jalǵyz másele emes. GGG Kalıfornııa shtatyndaǵy Bıg Bear zalynda jattyǵady. Onda sportshylar bıiktikte jattyǵý úshin barady. Eger onyń jasyn eskersek, qaýip-qater bar.  Mysaly, bulshyqet massasynyń joıylýy jáne qyzyl qan túıirshikteri deńgeıiniń joǵarylaýy qannyń qoıýlanýyna ákeledi, al ol júrekke túsetin salmaqty arttyrady, - deıdi Raıan O’Hara.

Onyń aıtýynsha, Abel Sanchesten ketkennen keıin Golovkınniń jyldamdyǵy baıaýlap, nátıjeli soqqy jasaı almaı júr.

Onyń qorǵanysy eshqashan myqty bolmaǵan. Degenmen taza soqqylardy jıi jiberetin boldy. Tipti, Stıv Rolls syndy qarsylastarynan soqqy aldy, - dep túıindedi jýrnalıst.

Sońǵy jańalyqtar