15 Qarasha, 09:34 304 0 Jahan Anar LEPESOVA

Darıǵa Nazarbaeva jumys saparymen Armenııaǵa bardy

Senat spıkeri Armenııa premer-mınıstri Nıkol Pashınıan, Armenııa prezıdenti Armen Sarkısıan jáne Ulttyq jınalys tóraǵasy Ararat Mırzoıanmen kezdesip, eki el arasyndaǵy yntymaqtastyqty, onyń ishinde parlamentaralyq baılanystardy damytý joldaryn talqylamaq, dep habarlaıdy «Habar 24».

Qazaqstan senatorlary Armenııa Ulttyq jınalysy tóraǵasynyń shaqyrýymen Erevanǵa bardy. Munda Darıǵa Nazarbaeva men Ararat Mırzoıan saıası, ekonomıkalyq jáne mádenı yntymaqtastyq jáne halyqaralyq máselelerdi talqylady.

– Armenııa men Qazaqstan arasyndaǵy qarym-qatynastar barlyq sala boıynsha damyp kele jatqany qýantady. Ara-qatynasty jaqyndastyrýda parlamentaralyq yntymaqtastyqtyń róli zor, - deıdi Armenııa Ulttyq jınalysynyń tóraǵasy Ararat Mırzoıan. 

Óz kezeginde Darıǵa Nazarbaeva Armenııa Táýelsiz memleketter dostastyǵy men Eýrazııalyq ekonomıkalyq odaqtaǵy Qazaqstannyń senimdi áriptesi ekenin atap ótti. Senat tóraǵasy Qazaqstan men Armenııa parlamentteri arasyndaǵy yntymaqtastyq tobynyń jumysyna erekshe kóńil bólip, zań shyǵarý jumysynda bul toptyń áleýetin tıimdi qoldaný qajettigin jetkizdi. Aıta keter jáıt, armıan depýtattarynyń bir toby bıyl mamyr aıynda Nur-Sultan qalasynda bolǵan edi.

– Halyqtarymyz arasyndaǵy tarıhı qatynastarymyzdy naǵyz baýyrlastyq dep batyl aıta alamyn. Tarıhı jáne mádenı tamyrlarymyz ortaq. Tipti armıan tilinde qazaqshaǵa uqsas kóp sózdi estımin. Qypshaq mádenıeti Armenııa jerine de jetken edi. Elderimiz arasyndaǵy taýar aınalymy joǵary, qazaqstandyq ónimderdiń Armenııaǵa eksporty Qazaqstanǵa armıan ónimderiniń ımportynan sál asyp tur. Jalpy statıstıkaǵa súıensek, 2018 jyly taýar aınalymy 14 jarym mıllıon dollarǵa jetti. Bul kórsetkish ótken kezeńmen salystyrǵanda edáýir ósti. Alaıda munymen shektelýge bolmaıdy. Osy qatynastarymyzdy damytýda áleýetimiz zor dep sanaımyn, - dedi Darıǵa Nazarbaeva.

Ekonomısterdiń pikirinshe, taýar aınalymyn áli de arttyrýǵa múmkindik jetkilikti. Eger bul jumystar júıeli túrde júzege assa, kóp uzamaı eki eldiń ózara árekettesýiniń ekonomıkalyq kórsetkishteri de kóterile túspek.

Sońǵy jańalyqtar