14 Qarasha, 20:51 323 0 Ekonomıka Anar LEPESOVA

Elbasy «Samuryq-Qazynanyń» memleketke qansha kiris ákelgenin aıtty

Qazaqstannyń Tuńǵysh Prezıdentiniń tóraǵalyǵymen «Samuryq-Qazyna» ulttyq ál-aýqat qoryn basqarý jónindegi Keńestiń otyrysy ótti, dep habarlaıdy Elbasynyń resmı saıty. 

Otyrys barysynda osy jyldyń mamyr aıynda ótken Keńeste berilgen tapsyrmalardyń oryndalý barysy qaraldy. «Samuryq-Qazyna» qory elimizdiń ulttyq ekonomıkasynda erekshe ról atqarady. Qordyń aldynda úlken mindetter tur. Bıyldyqqa bul Keńestiń ekinshi otyrysy», - dedi Elbasy.

Keńeste «Samuryq-Qazyna» UÁQ» AQ Basqarma Tóraǵasy A.Esimov, «QTJ» UK» AQ Basqarma Tóraǵasy S.Myńbaev, «QazMunaıGaz» UK» AQ Basqarma Tóraǵasy A.Aıdarbaev, «Qazatomónerkásip» UAK» AQ Basqarma Tóraǵasy G.Pırmatov baıandama jasady. Usynylǵan aqparatty tyńdaı kele, Nursultan Nazarbaev Qor basshylyǵy júıeli máselelerdi sheship, óndiristik kórsetkishter men ındıkatorlardyń oń dınamıkasyna qol jetkizgenin atap ótti.

«Byltyr Qordyń taza kirisi 2017 jylǵy deńgeımen salystyrǵanda 88 paıyzǵa artty. Bıyl taǵy 40 paıyz ósimdi baıqap otyrmyz. Osy jylǵy 9 aıdyń kórsetkishi byltyrǵy bir jyldyq kórsetkishten joǵary. Bul jaqsy dınamıka. Ákimshilik jáne basqa da tıimsiz shyǵyndardy júıeli túrde azaıtyp jatyrsyzdar. Munyń barlyǵy quptarlyq jumys», - dedi Qazaqstannyń Tuńǵysh Prezıdenti.

Elbasy birlesken kásiporyndardaǵy memlekettik úlesterdi tıimdi basqarýdy qamtamasyz etýdiń mańyzdylyǵyna toqtaldy. «Qor 268 mıllıard teńge taza aqshalaı kiris túsirip, memleketke 70 paıyzyn, ıaǵnı 190 mıllıard teńge ákeldi. Bul ótken jylǵy kórsetkishten 2 ese kóp. Sondaı-aq, aqshalaı túrde dıvıdendter mólsheri 5 ese ósti. Munymen shektelip qalmaı, osy baǵyttaǵy jumysty jalǵastyrǵan jón», - dedi Nursultan Nazarbaev.

Sonymen birge, Qazaqstannyń Tuńǵysh Prezıdenti munaı-gaz jáne hımııa ónerkásibi salalaryndaǵy tıimsiz ýchaskelerdegi óndiristi yntalandyrýdyń jańa tetikterin engizý nátıjeligine nazar aýdardy. «Jańa tetikterdi engizý arqyly óndiris kólemin ulǵaıtý men áleýmettik máselelerdi sheshýden bastap, qajetti qorlar úlesin ulǵaıtýǵa deıingi keshendi mindetter sheshilýde. Úkimet bul tásilderdi zerttep, qoldaý kórsetýi qajet», - dedi Elbasy.

Sondaı-aq, otyrys barysynda Qor kompanııalarynyń IPO-ǵa shyǵýy jáne satyp alýlardyń tıimdiligin qamtamasyz etý máseleleri talqylandy. «Bir kózden satyp alý shamamen 1,5 ese qysqardy jáne básekege qabiletti satyp alý kólemi 4 ese ósti. Nátıjesinde únemdilik te artty. Búgingi kúni únemdelgen qarajattyń kólemi 130 mlrd teńgeden asady», - dedi Nursultan Nazarbaev.

Nursultan Nazarbaev «Samuryq- Qazyna» AQ-nyń 2018-2028 jyldarǵa arnalǵan damý strategııasyn iske asyrýdyń oń nátıjelerin atap ótip, Qor kompanııalarynyń qarjylyq jaǵdaıyn jaqsartýǵa jáne jekeshelendirý josparyn odan ári iske asyrýǵa baǵyttalǵan usynystardy qarastyrýdyń mańyzdylyǵyn atap ótti.

«Samuryq-Qazyna» – ulttyq ál-aýqat qory. Sondyqtan biz Basqarý keńesi men Dırektorlar keńesi retinde turǵyndar men bıznes ókilderi tarapynan Qor qyzmetine degen senimdi arttyrý maqsatynda júıeli jumystar júrgizýimiz qajet. Azamattar munyń bári Qazaqstanǵa jáne bizdiń halqymyzǵa tıesili ekenin túsinýi kerek, - dep qorytyndylady Elbasy.

 

Sońǵy jańalyqtar