7 Qarasha, 16:04 299 0 Rýhanııat Anar LEPESOVA

II respýblıkalyq «Dilmar» sheshendik óner baıqaýy ótti

Abaı atyndaǵy mamandandyrylǵan daryndy balalarǵa arnalǵan qazaq tili men ádebıetin tereńdete oqytatyn mektep-ınternatynda II respýblıkalyq «Dilmar» sheshendik óner baıqaýy ótti. Baıqaýǵa elimizdiń 3 qalasy, 10 oblysynan 38 oqýshy qatysyp, úsh kezeń boıynsha baryn salyp, baǵyn synady.

Baıqaý shymyldyǵy Qurmanǵazynyń kúmbirlegen kúıimen ashyldy. Artynsha mektepti tanystyrý arnaýy men sheshendik ónerdiń mańyzyn ashatyn kórinis kórsetildi. Igi sharanyń uıymdastyrýshysy mektep-ınternat dırektory Roza Seksenova baıqaýdyń mán-mańyzy, maqsaty men ereksheligin atap, qatysýshylarǵa sáttilik tiledi.

«Ónerdiń eń asyly sóz óneri» demekshi, «Dilmar» saıysy oqýshylardyń sheshendik deńgeıin shyn anyqtady. Kil júırikte kim júırik ekenin anyqtaý úshin tanymal ǵalymdar, aqyn-jazýshy, dıktorlar men zertteýshilerden quralǵan ádilqazylar tórelik etti. Olar: Marat Toqashbaev, Amanjan Eńsebaıuly, Gúlbaný Qosymova, Serik Qalıev, Ermuhamet Maralbek sııaqty sóz óneriniń maıtalman mamandary qatysýshylardyń túrli deńgeıine jeke-jeke baǵa berdi.

12.png

Bul baıqaýdyń maqsaty: sheshendik ónerdi jas urpaqqa sińirip, sóz mádenıetin túzeý. Osy talaptardy anyqtaý 3 kezeńdi qurady. Alǵashqy kezeńde bı-sheshender men aqyn-jyraýlardyń sheshendik paıym, tolǵaýlaryn jalǵastyrý talap etildi. Ekinshi bólimde turaqty tirkes, odaǵaı, maqal-mátel t.b. berilgen 3 sóz arqyly saýatty sóılem quraý talap etildi. Al naǵyz kósile sóılep, sheshile sheshendik tanytatyn III kezeń kóp qatysýshynyń naǵyz bolmysyn, bilimi men sózdik qoryn kórsetti.

Bul baıqaýdyń ózge baıqaýlardan ereksheligi óte kóp. Mysaly: qatysýshylardyń jerebelik nómiri ulttyq mura – asyqpen anyqtalsa, saıys Amanjan Eńsebaıulynyń aq batasymen jandanyp, kóńilimizdi marqaıtatyn shashýmen shattyǵymyz eselendi.

Baıqaý barysynda top jarǵan dúldúlder de, eki sózdiń basyn jóndi quraı almaıtyndar da baıqaldy. Keıbiri búgingi tańdaǵy ózekti máselelerdi qozǵaımyz dep taqyryptan aýytqyp, sóz ben oı qaıtalaýǵa májbúr boldy. Meniń oıymsha, keıbir qatysýshylar ózderin tolyqtaı kórsetip, bolashaqtyń sóz bastar serkeleri bolatyndaryna sendirdi. Bul qýantarlyq jaıt.

Saıystyń qorytyndysy boıynsha bas júlde qostanaılyq Dosymhanova Aıakózge, I oryn Abaı atyndaǵy RMMI oqýshysy Dáýletbek Dýmanǵa, II oryn qyzylordalyq Baltabaeva Ardaqqa, aqtóbelik Kádirbaı Marǵulanǵa berilse, III oryndar Almaty oblystan kelgen Bektur Mereıge, almatylyq Ashılbekova Rozaǵa, shymkenttik Jádigerova Gúlsánǵa berildi.

Sheshendik óner barlyq ónerdi talap etetin erekshelikke ıe bolǵandyqtan oǵan atústi qaramaýymyz kerek ekenin ańǵardyq. Osyndaı is-sharalar arqyly babalar sózi balalar esinde máńgi jańǵyra bermek.

«Dilmar» sheshendik óner baıqaýynyń joba jetekshisi men turaqty demeýshisi, rýhanııattyń naǵyz janashyry – «Zeınolla Sánik atyndaǵy mádenıet qory».

Sońǵy jańalyqtar