7 Qarasha, 13:14 300 0 Tulǵa Anar LEPESOVA

Almatylyqtar Raısa Muhamedııarovany aqtyq saparǵa shyǵaryp saldy

Almatyda KSRO jáne Qazaqstannyń eńbek sińirgen ártisi Raısa Muhamedııarovany aqtyq saparǵa shyǵaryp salý rásimi ótti.

Qaraly jıyn Almatydaǵy Ǵ. Músirepov atyndaǵy qazaq balalar jáne jasóspirimder akademııalyq teatrynda ótti. Ártisti aqyrǵy saparǵa shyǵaryp salýǵa teatr jáne kıno ártisteri, zııaly qaýym ókilderi, qala halqy, ónersúıer qaýym qatysty.

Jınalǵandarǵa Nur-Sultan qalasynan arnaıy kelgen qoǵam qaıratkeri Mádı Artyǵalıev QR Prezıdenti Qasym-Jomart Toqaevtyń kóńil aıtý jedelhatyn oqyp berdi. «Belgili mádenıet qaıratkeri, teatr jáne kıno ártisi Raısa Muhamedııarovanyń dúnıeden ótýine baılanysty aýyr qaıǵylaryńyzǵa ortaqtasyp kóńil aıtamyn. Raısa Májitqyzy uzaq jyldar boıy teatrda óner kórsetip, keıipkerlerdi asqan sheberlikpen sahnaǵa shyǵara bilip, kórermen qaýymnyń ystyq yqylasyna bólendi. Sondaı-aq kórkem fılmderge túsip, kóptegen basty rólderdi somdady. Onyń esimi men jarqyn beınesi óner súıer qaýymnyń júreginde máńgi saqtalady», - delingen Prezıdenttiń jedelhattynda.

Sonymen qatar, QR Parlamenti Senatynyń tóraǵasy Darıǵa Nazarbaeva, QR Mádenıet jáne sport mınıstri Aqtoty Raıymqulova, Almaty qalasynyń ákimi Baqytjan Saǵyntaev jáne Nur-Sultan qalasynyń ákimi Altaı Kólginov kóńil aıtý jedel hatyn joldady. Qaraly jıynda, óner adamdary marqumnyń óneri men ómiri týraly aıtyp, eske aldy.

«Teatr jáne kıno álemi taǵy bir shoqtyǵy bıik juldyzynan aıryldy. Búgin Raısa Muhamedıarovany aqtyq saparǵa shyǵaryp salyp turmyz. Raısa qazaqtyń kınosy men teatrynda «sulýlyqtyń sımovoly» bolatyn. Sahnadaǵy erekshe obrazdarymen este qaldy. Kıno salasynda da ózindik orny bar aktrısa edi. Kınodaǵy árbir beınesi kórermeniń esinde máńgi saqtalady. Biz sııaqty jastar sol kisilerdiń oınaǵan kınosyn kórip eseıdik, eliktedik, bala keıipimizben ǵashyq boldyq. Búgin mine máńgi mekenine shyǵaryp salyp jatyrmyz», - dedi qaraly jıynda Ǵ. Músirepov atyndaǵy qazaq balalar jáne jasóspirimder akademııalyq teatrynyń dırektory Azamat Satybaldy.

Raısa Muhamedııarova 1963 jyly rejısser Sultan Qojyqovtyń qazaq kınosynyń altyn qorynan oryn alǵan «Meniń atym - Qoja» fılminde ustaz Maıqanovanyń rólimen halyqqa keńinen tanyldy. 30-ǵa jýyq fılmge túsken. Aıta keteıik, 1964 jyly Raısa Muhamedııarova jazýshy Ǵabıt Músirepovke turmysqa shyǵyp, 8 jyl nekede bolǵan. Aktrısa 80 jasynda dúnıeden ozdy.

 

Sońǵy jańalyqtar