6 Qarasha, 10:51 292 0 Áleýmet Anar LEPESOVA

Turǵyndar qarsy: Elordada lıft qyzmeti úshin tólem jasaý júıesi ózgerdi

Elordadaǵy kópqabatty 15 úıde lıft qyzmeti úshin tólem jasaý júıesi ózgerip ketti, dep habarlaıdy «Habar 24».

Buryn kartamen tólep kelgen turǵyndardy abonettik tólemge aýystyryp jibergen. Iaǵnı, lıftini qoldansań da, qoldanbasań da aıyna 1 myń 430 teńge tóleýge mindettisiń. Bul júıe adam sanyna da baılanysty emes. Tólem jasaýdyń jańa ádisi keıbir turǵyndardyń kóńilinen shyqpaı otyr.

Turǵyndardyń kóbi jańa júıege qarsy. Máselen, páterde jalǵyz turatyndar buryn aıyna 500 teńge tóleıtin. Abonettik tólemge ótkennen keıin, onyń quny úsh  ese kóbeıip ketken. Lıftini múlde qoldanbaıtyndardyń shaǵymy óz aldyna. Páterleri tómengi qabatta ornalasqandar da basqarýshy kompanııaǵa 1430 teńge tóleýge mindetti.

"Biz jubaıymyz ekeýmiz 500 teńgeden tóleıtinbiz. Ol 500, men 500 teńge. Osy aqsha bir aıǵa jetetin edi. Eski ádispen salystyrsaq, qazirgi júıe qymbatqa shyǵyp tur. Zeınetkerlerge tóleý ońaı emes. Bul tarıfti qaıta qaraý kerek dep oılaımyn. Ár otbasyna 1000 teńge bolsa da jaraıdy ǵoı. 1, 2, 3 qabat turǵyndary tipti lıftige minbeıdi de", - deıdi narazy turǵyndardyń biri.

Ázirge, bas qalada jańa júıege 15 kóshti. Kondomınımým nysandaryn basqarý kásiporny ókiliniń málimdeýinshe,  turǵyndardyń ózderi kartochkamen tóleýdiń qolaısyz ekenin aıtyp, shaǵymdanǵan. Iaǵnı, máseleniń eki ushy bar. Qarsy jaq ta, jańa tarıfti qoldaıtyndar da bar. Bul «pılottyq joba» bolǵandyqtan, áli de talqylanady.

"Biz turǵyndardyń talap-tilegi boıynsha jumys isteımiz. Ortaq múlikti basqarý kezinde olardyń oıy eskeriledi. Buǵan deıin kartochkamen tóleý júıesin abonenttik tólem júıesine aýystyrý týraly ótinshter boldy. Qazir árbir úıdiń turǵyndarymen jan-jaqty talqylaýǵa daıynbyz. Qarasha aıynyń birinen bastap, pılottyq joba iske qosyldy. Páter ıeleri lıftini esh kedergisiz qoldana alady. Al bekitilgen baǵa týraly aıtsaq, ol týraly talqylap, bir sheshimge kelýge bolady", - deıdi basqarýshy kompanııa dırektory Erjan Ismaǵulov.

Al úlken otbasylar bolsa, burynǵydaı aqsha salyp áýre bolmaımyz, úıge kelgen qonaqtardy da  jekelep lıftimen kóterip júrmeımiz, dep jańa júıeni qoldap otyr.

Kóp qabatty úılerdiń turǵyndary sol úıdiń menshik ıesi sanalady. «Turǵyn úı qatynastary týraly» Zańnyń 301 babyna sáıkes, lıftiler ortaq múlikke jatady. Iaǵnı turǵyndardyń pikirimen sanaspaı, eshteńe isteýge bolmaıdy. Sondyqtan, turǵyndardyń pikirin bilmeı turyp, abonenttik tólem júıesin engizý zańǵa qaıshy. Qyzmet kórsetýshi kompanııa áli de bolsa páter ıeleriniń usynystaryn tyńdaýǵa nıetti ekendikterin aıtady. Eger de turǵyndar ortaq mámilege kele almaǵan jaǵdaıda, sapany baqylaý basqarmasyna shaǵymdana alady.

Sońǵy jańalyqtar