4 Qarasha, 10:27 341 0 Sport Anar LEPESOVA

Taǵy da chempıon: "Astana" altynshy márte el úzdigi atandy

«Astana» qatarynan altynshy ret Qazaqstan chempıony atandy. Elordalyq komanda premer-lıganyń aıaqtalýyna bir týr qalǵanda «Qaırattan» qara úzip ketti. Roman Grıgorchýk shákirtteri Qostanaıda "Tobyldyń" osal tusyn tapsa, almatylyqtar Pavlodarda «Ertiske» tótep bere almady. 

«Astana» komandasynan sheshýshi goldy 38-mınýtta Iýrıı Logvınenko soqty. Qorǵaýshy áýelep kelgen dolpty baspen qaqpaǵa dál baǵyttady. «Tobyl» qola júldeden dámeli edi. Sondyqtan alań ıeleri de ataqty qarsylasyn aıaqtan shalýǵa tyrysty. Tipti alǵashqy taımda Qostanaı fýtbolshylary esep ashqan edi. Alaıda tóreshi goldy eseptegen joq. Qorytyndy esep: 0:1. «Astana» sheshýshi synda tabandylyq tanytyp, altynshy jyl chempıondyq ataqty eshkimge ustatpady. Bul kórsetkish jaǵynan elorda komandasy Qazaqstanda jeke-dara alǵa shyqty.

«Astana» 2014 jyldan beri premer-lıgada top jaryp júr. Sońǵy týrda olar «Qaıratty» toqtatqan «Ertisti» qabyldaıdy. 32-týrda "Aqtóbe" "Shahterdi" qabyldap, 3:2 esebimen jeńiske jetti. "Oqjetpes" "Jetisýmen" upaı bólisti. Esep:1:1. "Taraz" "Qaısardy" qabyldap, 2:1 nátıjesimen basym tústi. "Ordabasy" syrt alańda "Atyraýdan" aılasyn asyrdy. Shymkent komandasy 3:1 esebimen mańyzdy  jeńisine qol jetkizdi. "Ertis" "Qaırat" qaqpasyna jaýapsyz bes dop soqty. 32-shi týrdan keıin "Astana" 69 upaı jınap, basty qarsylasy "Qaırattan" ozyp ketti.

Almaty komandasy kezekti márte kúmis júldeni qanaǵat qyldy. Qola medaldan "Ordabasynyń" úmiti zor. Shymkent komandasynan eki upaıy kem "Tobyl" da úshinshi orynnan kúder úzgen joq. "Aqtóbe" bıylǵy birinshilikti sátsiz ótkizip, birinshi lıgaǵa túsip qaldy. "Taraz" ben "Atyraýdyń" da jaǵdaıy qıyn.

«Qyzyl-Jar» komandasy premer-lıgaǵa joldama aldy. Petropavl fýtbolshylary Qazaqstan birinshi lıgasynda top jaryp, qaıtadan joǵarǵy topqa qosyldy. Álı Álıev shákirtteri sońǵy týrda "Baıqońyrdy" qabyldap, 6:0 esebimen jeńiske jetti. "Qyzyl-Jar" 26 matchta 58 upaı jınap, eń nátıjeli komanda atandy. Ekinshi oryn "Kaspııge" buıyrdy. Aqtaý komandasy da premer-lıgaǵa shyqty. Qola medaldy "Aqjaıyq" utty. Oral klýby endi premer-lıganyń komandasymen joǵarǵy lıganyń qosymsha joldamasyna talasady.

 

Sońǵy jańalyqtar